पिपरा उपनिर्वाचनमा कांग्रेसले बनायो विजय यादवलाई उम्मेदवार

कात्तिक २२, २०७६

जनकपुरधाम – महोत्तरीको पिपरा गाउँपालिकामा मंसिर १४ गते हुन गइरहेको उपनिर्वाचनमा नेपाली कांग्रेस महोत्तरीले विजयकुमार यादवलाई उम्मेदवार बनाएको छ ।

उम्मेदवारको नाम छनौट गर्न बसेको संसदीय बोर्डको बैठकबाट यादवको नाम बहुमतले सिफारिस गरिएको हो । 


ADVERTISEMENT

नेपाली कांग्रेस महोत्तरीका सभापति महेन्द्रकुमार रायको अध्यक्षतामा सचिव शम्भु नारायण पाठक, कोषाध्यक्ष किशोर कुमार सिंह, केन्द्रीय सदस्य किरण यादव, कल्याण गुरुङ र सभापतिले मनोनयन गरेको ५ जना सदस्य नागेश्वर यादव, नबल पाण्डे, सुशील कुमार यादव, मोहन पाण्डे, बिन्देश्वर साहसहित १० सदस्यीय बोर्ड गठन गरिएको थियो ।

सभापति रायले क्षेत्रीय र प्रदेश कमिटीबाट १३ जना उम्मेदवारको नाम सिफारिस भई आएको बताए । जसमध्ये ८ जनाले विजय कुमार यादवको नाम बहुमतले पारित भई छनौट गरिएको छ तर संसदीय बोर्डका २ जना सदस्य नागेश्वर यादव र नबल पाण्डेले निर्णयमा असहमति जनाउँदै ‘नोट अफ डिसेन्ट’ लेखेका छन् । 

दुवै जनाले क्षेत्रीय सभापति राघबेन्द्र झाको नाम सिफारिस गरेका भएपनि बहुमत सदस्यले यादवको नाम छनौट गरेकाले यादव नै उम्मेदवार हुने सभापति रायले बताए । ‘नोट अफ डिसेन्ट’ लेख्ने यादव भने यसअघि महोत्तरीको जिल्ला सभापति पदका उम्मेदवार थिए । महेन्द्र कुमार रायबाट उनी पराजित भएका थिए ।

‘अब शुक्रवार पार्टीको जिल्ला कार्यसमितिको बैठकबाट यादवको नाम अनुमोदन भई अन्तिम छनौट हुनेछ,’ सभापति रायले लोकान्तरसँग भने, ‘गाउँपालिकामा जित्न सक्ने उम्मेदवार भएको तथा उनी विगतमा पनि २ पटक जिल्ला कार्यसमिति सदस्य भइसकेको र हाल पनि जिल्ला कार्यसमिति सदस्य रहेकाले उनको नाम छनौट गरिएको हो ।’

यसअघि राम किशोर यादव, विजय यादव, राघबेन्द्र झा, राम एकवाल ठाकुर, मन्जुर आलम, राम पदार्थ झासहित १३ जनाको नाम सिफारिस गरिएको थियो । कांग्रेसको विधान अनुसार १ जनामहिला गरी ३ जना उम्मेदवारको नाम मात्र सिफारिस गर्नुपर्ने परिपत्र भएपनि १३ जनाको नाम सिफारिस गरिएको थियो ।

सिफारिस गरिएका यादव समाजवादी पार्टी नेपालका केन्द्रीय नेता तथा पूर्व कृषि मन्त्री हरिनारायण यादवका भाइ हुन् । दाजु हरिनारायण यादव समाजवादी पार्टीमा छन् भने भाइ विजय यादव नेपाली कांग्रेसमा छन् ।

पिपरामा राजपा पार्टीबाट अध्यक्ष पदमा निर्वाचित विनोद कुमार चौधरीको निधन भएपछि अध्यक्ष पदका लागि उपनिर्वाचन हुँदैछ ।

कात्तिक २२, २०७६ मा प्रकाशित

अजय अनुरागी

अजय अनुरागी लोकान्तरका लागि प्रदेश नम्बर दुई प्रतिनिधि हुन् । 

लेखकबाट थप...

प्रतिक्रिया दिनुहोस