वामदेवलाई राष्ट्रिय सभामा पठाउने निर्णय प्रधानमन्त्रीले मान्नुहुन्छ, मान्नैपर्छ : प्रचण्ड

फाइल फोटो

नेपाल कम्युनिस्ट पार्टी (नेकपा) अध्यक्ष पुष्पकमल दाहाल 'प्रचण्ड'ले उपाध्यक्ष वामदेव गौतमलाई राष्ट्रिय सभामा पठाउने पार्टी सचिवालयको निर्णय प्रधानमन्त्रीले कार्यान्वयन गर्नुपर्ने बताएका छन् ।

गृहजिल्ला चितवनमा शुक्रवार सञ्चारकर्मीहरूसँग कुरा गर्दै अध्यक्ष प्रचण्डले पार्टी निर्णय प्रधानमन्त्रीले मान्नुको विकल्प नरहेको बताएका हुन् ।


Advertisement

'तपाईंहरूले थाहा पाइसक्नुभएको छ, राष्ट्रिय सभामा लैजाने एउटा सीट जुन छ, त्यसमा सचिवालयको सर्वसम्मत निर्णयअनुसार गौतमलाई पठाउने सुझाव दिएको छ,' प्रचण्डले भने, 'आधिकारिक निर्णय भएको हो, र सर्वसम्मत ढंगबाट भएको हो, प्रधानमन्त्रीले मान्नुहुन्छ, मान्नैपर्छ ।'

युवराज खतिवडालाई अर्थमन्त्री बनाइराख्न अहिले नै राष्ट्रिय सभामा लैजानैपर्ने बाध्यात्मक अवस्था नरहेको प्रचण्डले बताए ।


Advertisement

'अर्थमन्त्री हुनका लागि राष्ट्रिय सभामा जानैपर्छ भन्ने छैन, हाम्रो अहिलेको संवैधानिक व्यवस्थाअनुसार राष्ट्रिय सभामा नगएपनि ६ महिनाका लागि मन्त्री बन्न कुनै अप्ठ्यारो छैन,' प्रचण्डले थपे ।

प्रधानमन्त्रीले पार्टीको निर्णय नमान्ने कुरा आफूले कल्पना समेत नगरेको प्रचण्डले बताए ।

'प्रधानमन्त्रीले (वामदेवलाई) सिफारिश नगर्ने कुरा म कल्पना पनि गर्न सक्दिनँ । उहाँले गर्नुहुन्छ, मैले त्यत्ति बुझेको हो । गर्नुभएन भने के भन्नेतिर म अहिले जान चाहन्न,' प्रचण्डले थपे, 'मलाई विश्वास छ, उहाँले आफ्नै अध्यक्षतामा बसेको बैठकले सर्वसम्मत ढंगबाट गरेको निर्णयलाई अवज्ञा गर्नुहुन्न ।'

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्