कार्यालय सहयोगीका पतिको भरमा प्रदेश लोक सेवा आयोग : न पदाधिकारी, न कर्मचारी !

अजय अनुरागी
अजय अनुरागी

अजय अनुरागी लोकान्तरका लागि खोज, राजनीति र समसामयिक विषयवस्तुमा कलम चलाउँछन् ।

२ नम्बर प्रदेश लोक सेवा आयोगमा कर्मचारीदेखि पदाधिकारीले आफूखुशी तालिम तथा काजमा जाने हुँदा आयोग नै खाली तथा सुनसान हुने गरेको छ ।

तालिमको नाममा आयोगका पदाधिकारीदेखि कर्मचारी सबै एकसाथ कार्यालय छोडेर जाने गरेका छन् ।


Advertisement

फागुन १५ गते बिहीवार आयोगको कार्यालयमा लोकान्तर प्रतिनिधि पुग्दा जम्माजम्मी २ जना कर्मचारी मात्र थिए । सहायक स्तर पाँचौं तहमा कार्यरत कम्प्युटर अपरेटर अमितकुमार यादव पनि अन्यत्र जाने तरखरमा थिए ।

‘आन्तरिक मामिला तथा कानून मन्त्रालयका सचिव कृष्णहरि पुस्करज्यूले भौतिक पूर्वाधार विकास मन्त्रालयमा बोलाउनु भएकाले उतै जान थालेको हुँ,’ यादवले भने, ‘आयोगमा एक जना कार्यालय सहयोगीलाई राखेर गइरहेको छु ।’


Advertisement

हेटौंडामा लोक सेवा आयोगले ७ वटै प्रदेशको लोक सेवा आयोगका पदाधिकारी तथा कर्मचारीलाई तालिममा बोलाएका कारण पदाधिकारीदेखि कर्मचारीहरू कार्यालय सुनसान देखिएको उनले बताए । यति बोल्दाबोल्दै उनी कार्यालयलाई कार्यालय सहयोगीको जिम्मा लगाएर बाहिरिएका थिए ।

कार्यालय सहयोगीको रुपमा आयोगमा खटिएका राजेन्द्र मेस्तर कार्यालयका कर्मचारी होइनन् । उनी आफ्नी पत्नी फुलकुमारी मेस्तरको सट्टामा खटिएका थिए । ‘श्रीमतीको घरमा काम परेकाले मैले सट्टामा आएर काम गरेको हो,’ मेस्तरले भने, ‘कार्यालय सहयोगीलाई बिदा मिल्दैन भनेर भनेकाले सट्टामा आएर मैले श्रीमतीको जिम्मेवारीको काम गरेको हुँ ।’

प्रदेश लोक सेवा आयोगका अध्यक्ष सुरेन्द्रप्रसाद यादव, सदस्यहरू महारुद्र झा र डा. सुजाता देवको कार्यकक्ष खुला नै रहेपनि उनीहरू कार्यालयमा उपस्थित थिएनन् । आयोगमा ११ जना कर्मचारी कार्यरत रहेपनि सुनसान थियो । दिउँसो २ बजे पूरै कार्यालय सुनसान थियो । 

आयोगमा सचिवको रुपमा कृष्णहरि पुस्कर नियुक्त भएपनि उनी आन्तरिक मामिला तथा कानून मन्त्रालयमा समेत सचिवको रुपमा कार्यरत रहेका कारण उनी त्यति बस्ने गर्छन् भने आयोगमा आउने गरेका छैनन् ।

उपसचिव चिरन्जीवी गौतम, अधिकृत गंगेश गुन्जन झा, प्रशन्नराज कर्ण, रजनी कर्ण, प्रविनलाल कर्ण लगायतका कर्मचारी अनुपस्थित नै थिए ।

हाजिरी पुस्तिकाको अभिलेख केलाउँदा चिरन्जीवी गौतमले फागुन १३ गतेसम्म हाजिरी गरेको, गणेश गुन्जन झाले माघ २९ गतेसम्म हाजिरी गरेको, प्रशन्नराज कर्णले फागुन ११ गतेसम्म हाजिरी गरेको देखियो । प्रायःजसो कर्मचारीहरू तालिम भन्दै काठमाडौं र अन्यत्र काजमा जाने गरेको हाजिरी पुस्तिकामा उल्लेख छ ।

अजय अनुरागी
अजय अनुरागी

लेखकबाट थप...

कमेन्ट गर्नुहोस्