कोरोनाबाट बच्न बुटवलमा किटाणुविरुद्ध औषधि छर्किंदै

प्रकाश आचार्य
प्रकाश आचार्य

प्रकाश आचार्य लोकान्तरका लागि ५ नम्बर प्रदेशका प्रतिनिधि हुन् ।

कोरोना भाइरस संक्रमण रोक्न विभिन्न पूर्व तयारी गरेको बुटवल उपमहानगरपालिकाले शहरलाई ‘डिस्इन्फेक्सन’ गराउन थालेको छ ।

बुटवल उपमहानगरपालिकाले कोरोना आइसोलेसन अस्पताल, १०० कोठाको व्यवस्थित क्वारेन्टाइन, विभिन्न १६ ठाउँमा फिवर क्लिनिक समेत सञ्चालन गरेको छ ।


Advertisement

अहिले बुटवल उपमहानगरपालिकाले विभिन्न ठाउँमा इन्फेक्सनविरुद्ध औषधि छर्किन शुरू गरेको छ । वडा नम्बर ५ को बजार क्षेत्रबाट शुक्रवार बिहानैदेखि डिस्इन्फेक्सन गराउन शुरू गरिएको प्रमुख शिवराज सुवेदीले जानकारी दिए ।

मानव स्वास्थ्यलाई असर नगर्ने खालको किटाणु मार्ने विशेष औषधि छर्किन शुरू गरिएको र यसलाई सबै वडामा पुर्‍याइने प्रमुख सुवेदीको भनाइ छ ।


Advertisement

बाक्ला घर र बस्ती रहेका टोलबाट यस्तो अभियान शुरू गरिएको वडा नम्बर–५ का अध्यक्ष तेजप्रसाद विश्वकर्माले जानकारी दिए । बुटवलमा बिहीवार ११३ जनाको परीक्षण भएको छ । 

रुघाखोकी लागेर र ज्वरो आएपछि कोरोनाको आशंका गर्दै उपमहानगरपालिकाका १० वटा स्वास्थ्य संस्था तथा लुम्बिनी प्रादेशिक अस्पतालमा स्वास्थ्य परीक्षण गराउन ११३ जना पुगेका थिए । उनीहरूलाई ज्वरो क्लिनिकमा परीक्षणपछि स्वाब संकलन गरेर परीक्षण गरिएको छ । आइसोलेसनमा उपचाररतको हालसम्मको परीक्षणमा कोरोना पुष्टि भने भएको छैन । यद्यपि राष्ट्रिय प्रयोगशालाको अन्तिम रिपोर्ट भने नआइसकेको लुम्बिनी प्रादेशिक अस्पतालका मेसु डाक्टर राजेन्द्र खनालले जानकारी दिए ।

आइसोलेनमा खटिएका चिकित्सक तथा फोकल पर्सन डा. सुदर्शन थापाले कोरोनाको लक्षण देखिएको भन्दै परीक्षणमा आएकाहरूको स्वास्थ स्थिर रहेको बताए । बुटवलको आइसोलेसन अस्पतालमा ७ जनाको उपचार जारी छ ।

यसअघि लुम्बिनी प्रादेशिक अस्पतालसहित उपमहानगरका स्वास्थ्य संस्थामा सञ्चालित ज्वरो क्लिनिकमा बुधवार एकैदिन २१७ जनाको परीक्षण भएको थियो । यीमध्ये प्रादेशिक अस्पतालमा १७ जना उपचाररत छन् भने १ जनालाई आशंका लागेर कोरोना विशेष अस्पतालको आइसोलेसनमा पठाइएको थियो ।

उनीसहित सबैको उपचार जारी रहेको र अवस्था स्थिर रहेको विशेषज्ञ थापाको भनाइ छ । उपमहानगरपालिका जनस्वास्थ्य महाशाखाका शाखा अधिकृत कुन्दनकुमार सिंहका अनुसार बुटवलका विभिन्न ठाउँमा ज्वरो क्लिनिक सञ्चालनमा छ र त्यहाँबाट प्रादेशिक अस्पताल हुँदै जटिल भएमा मात्रै आइसोलेसनमा पठाउने गरिएको छ ।

त्रसित होइन, सजग र सावधान रहन नगर आग्रह गर्दै प्रमुख शिवराज सुवेदीले नगरबासीलाई सार्वजनिक सन्देश सहितको अपिल जारी गरेका छन् । 

प्रकाश आचार्य
प्रकाश आचार्य

लेखकबाट थप...

कमेन्ट गर्नुहोस्