भारतबाट स्वदेश भित्रिने बढे, क्वारेन्टाइन बढेनन् !

भारतमा रेल सेवा सञ्चालनमा आएसँगै स्वदेश  फर्किने नेपालीको संख्या दैनिक बढ्दो रहेको छ । 

फर्किएकालाई अहिले सीमानाकाबाटै सम्बन्धित स्थानीय तहले क्वारेन्टाइनमा ल्याएर राख्न थालेका छन् ।


Advertisement

बढ्दो चापले क्वारेन्टाइनको व्यवस्थापन मिलाउन स्थानीय तहलाई निकै चुनौती थपिएको छ । बस्ने, खानपानको व्यवस्था मिलाउनेसँगै व्यवस्थित तरिकाले राख्नका लागि स्थानीय तहमा कार्यरत कर्मचारीको व्यस्तता बढेको छ । ५ दिनको अवधिमै पश्चिमी सीमा नाकाबाट १० हजार बढी स्वदेश भित्रिएका छन् ।

तीमध्ये आधा बढी कञ्चनपुरका बासिन्दा छन् । कारोना भाइरसको जोखिमलाई ध्यानमा राख्दै क्वारेन्टाइनमा बस्नेलाई सामाजिक दूरी कायम गराउने, व्यक्तिगत सरसफाइमा ध्यान दिने, रोग प्रतिरोधात्मक क्षमता बढाउन पोषणयुक्त खानेकुराको व्यवस्था गराउने कार्य गरिँदै आएको छ ।


Advertisement

शुक्लाफाँटा नगरपालिका स्वास्थ्य शाखाका प्रमुख परमानन्द भट्टले भने, ‘स्वास्थ्य जाँचकार्यलाई समेत त्यत्तिकै ध्यान दिन थालेका छौं ।’ 

किट अभावमा क्वारेन्टाइनमा बस्दै आएका सबैको आरडीटी र पीसीआर परीक्षण हुन सकेको छैन । जोखिमयुक्त क्षेत्रबाट आएका र जोखिम हुनसक्ने व्यक्तिको कोरोना परीक्षण हँुदै आएको उनले जानकारी दिए । यसैगरी दैनिक स्वदेश फर्कनेको चाप बढ्ने हो भने क्वारेन्टाइनमा राख्न समस्या त हुन्छ नै सम्हाल्न समेत गाह्रो हुन्छ,’ उनले भने । ५ दिनअघिसम्म रित्तो अवस्थामा रहेका क्वारेन्टाइनमा सम्हाल्न नसकिने गरी नागरिक आइपुगेका छन् ।

बढ्दो चापलाई मध्यनजर गर्दै जिल्लाका ९ वटै स्थानीय तहले क्वारेन्टाइनको क्षमतामा वृद्धि गरेका छन् ।
 
नगरपालिकामा मात्रै सीमित क्वारेन्टाइनलाई वडा–वडामा विस्तार गरिएको छ । वडाध्यक्षको संयोजकत्वमा क्वारेन्टाइन व्यवस्थापनका लागि समिति गठन गरिएको छ । नगरपालिकामा क्वारेन्टाइन व्यवस्थापन मूल समिति रहेको छ । जिल्ला प्रशासन कार्यालयका अनुसार ९ वटै स्थानीय तहमा क्वारेन्टाइनको संख्या १३७ रहेको छ ।

क्वारेन्टाइनमा शय्या संख्या ६ हजार १९४ र क्वारेन्टाइनमा रहेका व्यक्तिको संख्या ५ हजार ८९२ रहेको छ । हालसम्म क्वारेन्टाइन अवधि पूरा गरी ८४८ घर फिर्ता भइसकेका छन् । विदेशबाट फर्किएका व्यक्तिको संख्या भने ११ हजार ५२३ रहेको छ ।

कञ्चनपुरमा क्वारेन्टाइनको संख्या भीमदत्त नगरपालिकामा १२५, महाकालीमा २४, बेदकोटमा १२, शुक्लाफाँटामा १८, कृष्णपुरमा १७, पुनर्वासमा १४, बेलौरीमा ७, लालझाडीमा ९, बेलडाँडीमा ११ गरी १३७ रहेको छ । क्वारेन्टाइनमा शय्याको संख्या भीमदत्त नगरपालिकामा ८००, महाकालीमा २ हजार, बेदकोटमा ४४२,  शुक्लाफाँटामा ७५०, कृष्णपुरमा ७६२, पुनर्वासमा ४५०, बेलौरीमा ३३५, लालझाडीमा २२०, बेलडाँडीमा ४३५ गरी ६ हजार १९४ रहेको छ ।

क्वारेन्टाइनमा रहेका व्यक्तिको संख्या भीमदत्त नगरपालिकामा ७०१, महाकाली नगरपालिकामा १ हजार १९९, बेदकोट नगरपालिकामा ४०७, शुक्लाफाँटा नगरपालिकामा ७००, कृष्णपुर नगरपालिकामा ७६२, पुनर्वास नगरपालिकामा ४४०, बेलौरी २७० लालझाडी गाउँपालिकामा २१९ र बेलडाँडी गाँउपालिकामा ३९४ गरी ५ हजार ८९२ छ ।

स्वदेश फर्कने सबैलाई अनिवार्यरूपमा क्वारेन्टाइनमा राखिँदै आएको छ । हालसम्म स्वाब परीक्षण ५९७ र  आरडीटी २ हजार ८९९ जनाको मात्रै गरिएको छ । फर्केका नागरिकलाई सम्बन्धित नगरपालिकाले सीमा क्षेत्रबाट क्वारेन्टाइनमा ल्याउन भरपर्दो साधनको अभाव छ । टिप्पर र ट्रक लगायतका साधनमा एकै ठाउँमा राखेर ल्याउने कार्यले कारोना भाइरसको संक्रमणको जोखिम निकै बढाएको बताइएको छ ।

कमेन्ट गर्नुहोस्