म्याग्दीमा बाढी र पहिरोको वितण्डा : करीब ३० जना बेपत्ता, उद्धारका लागि पुग्नै मुस्किल !

अविरल वर्षापछिको बाढी तथा पहिरोका कारण म्याग्दीमा करीब ३० जना बेपत्ता भएका छन् । २ जनाको मृत्यु भएको छ ।

गएराति देखिको बाढी तथा पहिरोका कारण धवलागिरि गाउँपालिकामा १९, मालिका गाउँपालिकामा ९ र मंगला गाउँपालिकामा १ जना बेपत्ता भएका छन् । 


Advertisement

धौलागिरि– ७ मा २ जनाको मृत्यु भएको सहायक प्रमुख जिल्ला अधिकारी महेश सुवेदीले लोकान्तरलाई जानकारी दिए ।

धवलागिरि गाउँपालिकाकी अध्यक्ष थमसरा पुनले १९ जना बेपत्ता भएको जानकारी दिएपनि सहायक प्रजिअ सुवेदीले बेपत्ताको संख्या २१ रहेको बताए ।


Advertisement

धवलागिरि वडा नम्बर ६ मा पहिरोले करीब ३५ घर बगाएको जिल्ला प्रहरी कार्यालय म्याग्दीका प्रहरी नायब उपरीक्षक (डीएसपी) किरणजंग कुवँरले लोकान्तरलाई जानकारी दिए ।

पहिरोबाट जोगिन सफलहरूलाई उद्धार गरी स्थानीय क्लबको भवनमा लगेर राखिएको गाउँपालिका अध्यक्ष पुनले जानकारी दिइन् ।

उद्धार गरिएका मध्ये २ जना गम्भीर घाइते छन् । अर्का एक बालक पहिरोमा परेको घरभित्र फसेको हुनसक्ने आशंकामा उद्धारका लागि पहल भइरहेको उनले बताइन् ।

उद्धारका लागि खटिएको सुरक्षाकर्मीको टोली भने घटनास्थलमा पुग्नै बाँकी छ ।

यस्तै मालिका गाउँपालिकाका अध्यक्ष श्रीप्रसाद रोका मगरका अनुसार वडा नम्बर ६ र ७ मा गरी ९ जना बेपत्ता भएका छन् ।

'मालिका– ७ बिमामा पहरिरोले ८/९ जनालाई बेपत्ता बनाएको खबर आएको छ,' अध्यक्ष रोकाले भने, 'वडा नं. ६ को डुखु भन्ने ठाउँमा एकजनालाई डुखु खोलाले बगाएको छ ।'

वर्षा रोकिएपनि पहिरो नरोकिएकाले उद्धारका लागि घटनास्थलतर्फ जान नसकिएको उनले जानकारी दिए ।

अध्यक्ष रोकाका अनुसार पहिरोमा परेको गाउँमा फोन सम्पर्क समेत हुन सकिरहेको छैन ।

म्याग्दीमा बाढी तथा पहिरोले पुर्‍याएको क्षतिको यकिन विवरण आइनसकेको डीएसपी कुँवरले बताए । 

प्रहरीका अनुसार घटनास्थल जिल्लाकै सबैभन्दा विकट क्षेत्र हो । जिल्ला प्रहरी कार्यालयबाट त्यहाँ पुग्न सामान्य अवस्थामा पनि करीब ७ घण्टा गाडीमा र ३ घण्टा पैदल यात्रा गर्नुपर्छ ।

‘यहाँबाट प्रहरी र नेपाली सेनाको टोली घटनास्थलतर्फ गइसकेको भएपनि राजमार्गमा पहिरो आएका कारण अवरोध सिर्जना भएको छ । अहिले वैकल्पिक मार्ग खोजेर अगाडि बढ्ने काम हुँदैछ,’ डीएसपी कुँवरले भने ।

विपद् व्यवस्थापनको टोली पनि घटनास्थलतर्फ गइरहेको उनले जानकारी दिए ।

बाढीले बेनी बजारमा रहेको बेलिब्रिज पनि बगाएको छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्