म्याग्दीबाट गाउँपालिका अध्यक्ष भन्छिन्– 'एउटै वडाका ४/५ गाउँको नामोनिसान मेटियो'

‘भूकम्पले केन्द्रबिन्दु बनाए जसरी पहिरोले एउटै वडाका ४/५ बस्तीको नामोनिसान मेटिदियो,’ म्याग्दीको धवलागिरि गाउँपालिका अध्यक्ष थमसरा पुनको भनाइ हो यो ।

राति २ बजेदेखि उनको फोन बजेकोबज्यै छ । शुरूमा वडा नम्बर ६ का वडाध्यक्ष राजाराम उपाध्यायले फोन गरे । 


Advertisement

‘राति फोन आएकोआयै गरेपछि ब्युँझिएर फोन उठाएँ, वडाध्यक्षले फोन गर्नुभएको रहेछ,’ अध्यक्ष पुनले भनिन्, ‘नसोचेको विपद् आइलाग्यो ।’

धवलागिरी– ६ का रिख, कुम्री, नांग्रुक, दमका, कल्लेनीलगायतका गाउँ पहिरोले लगेको अध्यक्ष पुनले जानकारी दिइन् ।


Advertisement

‘४/५ वटा गाउँ पूरै पहिरोले लगेको छ, घरको नामोनिसान छैन,’ अध्यक्ष पुनले भनिन्, ‘पहिरोबाट ज्यान जोगाएकाहरूलाई स्थानीय क्लबको भवनमा लगेर राखिएको छ ।’

अहिलेसम्म पहिरोमा परी १९ जना बेपत्ता भएको उनले बताइन् ।

यता म्याग्दीका सहायक प्रमुख जिल्ला अधिकारी महेश सुवेदीले भने धवलागिरि गाउँपालिकामा मात्रै २१ जना बेपत्ता भएको जानकारी दिए ।

गाउँपालिका अध्यक्ष पुनका अनुसार उद्धारका लागि खटिएको टोली अझै घटनास्थलमा पुग्न सकेको छैन ।

स्थानीयले अहिले पहिरोमा परेको एउटा घरमा बालक फसेको हुनसक्ने आशंकामा उद्धारको पहल गरिरहेका छन् ।

‘एउटा घरमा बालक फसेको भन्ने आशंकामा उद्धारका लागि पहल हुँदैछ,’ अध्यक्ष पुनले भनिन्, ‘ती बालकका बाबुआमा भने बेपत्ता छन् ।’

पहिरोमा परेका २ जनालाई गम्भीर घाइते अवस्थामा उद्धार गरिएको छ ।

धवलागिरिकै वडा नम्बर ७ मा पनि पहिरोले क्षति पुर्‍याएको छ । स्वास्थ्य चौकी भवन बगाएको र मानवीय क्षति भने नभएको अध्यक्ष पुनले जानकारी दिइन् ।

म्याग्दीकै मालिका गाउँपालिकामा ९ र मंगला गाउँपालिकामा १ जना बेपत्ता भएका छन् ।

मालिका गाउँपालिका अध्यक्ष श्रीप्रसाद रोका मगरका अनुसार वडा नम्बर ६ र ७ मा गरी ९ जना बेपत्ता भएका हुन् ।

'मालिका– ७ बिमामा पहरिरोले ८/९ जनालाई बेपत्ता बनाएको खबर आएको छ,' अध्यक्ष रोकाले भने, 'वडा नं. ६ को डुखु भन्ने ठाउँमा एक जनालाई डुखु खोलाले बगाएको छ ।'

वर्षा रोकिएपनि पहिरो नरोकिएकाले उद्धारका लागि घटनास्थलतर्फ जान नसकिएको उनले जानकारी दिए ।

अध्यक्ष रोकाका अनुसार पहिरोमा परेको गाउँमा फोन सम्पर्क समेत हुन सकिरहेको छैन ।

म्याग्दीमा बाढी तथा पहिरोले पुर्‍याएको क्षतिको यकिन विवरण आइनसकेको जिल्ला प्रहरी कार्यालय म्याग्दीका डीएसपी किरणजंग कुँवरले बताए । 

प्रहरीका अनुसार घटनास्थल जिल्लाकै सबैभन्दा विकट क्षेत्र हो ।

जिल्ला प्रहरी कार्यालयबाट त्यहाँ पुग्न सामान्य अवस्थामा पनि करीब ७ घण्टा गाडीमा र ३ घण्टा पैदल यात्रा गर्नुपर्छ ।

‘यहाँबाट प्रहरी र नेपाली सेनाको टोली घटनास्थलतर्फ गइसकेको भएपनि राजमार्गमा पहिरो आएका कारण अवरोध सिर्जना भएको छ, अहिले वैकल्पिक मार्ग खोजेर अगाडि बढ्ने काम हुँदैछ,’ डीएसपी कुँवरले भने ।

विपद् व्यवस्थापनको टोली पनि घटनास्थलतर्फ गइरहेको उनले जानकारी दिए ।

बाढीले बेनी बजारमा रहेको बेलिब्रिज पनि बगाएको छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्