नेकपासँग कांग्रेसको प्रश्न– प्रधानमन्त्रीको शैली र अभिव्यक्ति बदल्ने कि प्रधानमन्त्री नै ?

फाइल फोटो

प्रमुख प्रतिपक्षी दल नेपाली कांग्रेसले प्रधानमन्त्री केपी शर्मा ओलीको अभिव्यक्ति नेपाल सरकार र नेकपाको मत होइन भने उनले शासन गर्ने नैतिक र राजनैतिक आधार गुमाएको पुष्टि हुने बताएको छ । 

पछिल्लो समय देशमा देखिएका विविध परिदृश्यमा प्रधानमन्त्री ओलीका अभिव्यक्तिले केही गम्भीर प्रश्न उब्जाएको भन्दै कांग्रेसले यस्तो बताएको हो ।


Advertisement

कांग्रेस प्रवक्ता विश्वप्रकाश शर्माले बुधवार विज्ञप्ति प्रकाशित गरी प्रधानमन्त्रीका अभिव्यक्तिहरूले नेपाल देश र सम्बन्धित दलको प्रतिनिधित्व गर्दैनन् भने प्रधानमन्त्री पद व्यक्तिको जमिन्दारी कि देशको जिम्मेवारी ? भनी प्रश्न गरेका हुन् । 

आजको परिस्थितिमा प्रधानमन्त्रीको दायित्व एकातर्फ, व्यवहार अर्कातर्फ हुनु देशका लागि दुर्भाग्य भएको कांग्रेसको ठम्याइ छ । 


Advertisement

‘बाढीपहिरोमा कयौंको मृत्यु भएका बेला देशको प्रधानमन्त्रीको दायित्व के हुन्छ र के हुनुपर्दछ ? केबल समवेदनाको एक वक्तव्य ?’ प्रवक्ता शर्माले प्रश्न गरेका छन्, ‘कोरोना महामारीका बेला देशको प्रधानमन्त्रीको दायित्व के हुन्छ, कयौंको मृत्यु र हजारौं संक्रमित भएको विवरण बहिखातामा सारेर बस्ने तर समय सदुपयोग गरेर युद्धस्तरमा तयारी नगर्ने ?’

कांग्रेसले भगवान् श्रीरामको जन्मभूमि अयोध्याबारे ओलीको अभिव्यक्तिप्रति पनि आपत्ति जनाएको छ ।

‘सर्वसम्मतिले देशको नयाँ नक्सा संसदबाट जारी भएपछि प्रधानमन्त्रीको दायित्व के हुन्छ ? गम्भीर कूटनैतिक पहलकदमी गर्ने कि नक्सालाई सत्ता राजनीतिको व्यक्तिगत हतियारका रूपमा उपयोग गर्ने ?’ विज्ञप्तिमा भनिएको छ, ‘नक्सा अनुरूपको जमिनमा हक स्थापित गर्न गम्भीर कुटनैतिक पहलकदमी भन्दा अयोध्याबारे विवादास्पद मत व्यक्त गर्नुको अर्थ विषयको गम्भीरताप्रति प्रधानमन्त्री गम्भीर हुनुहुन्न भन्ने पुष्टि त भएको छ नै अपरिपक्व टिप्पणीमार्फत उहाँले संवेदनशील विषयमा असंवेदनशील व्यवहार प्रस्तुत गर्नुभएको छ ।’

कांग्रेसले प्रधानमन्त्रीको अभिव्यक्ति र शैली बदल्ने कि प्रधानमन्त्री नै बदल्ने भनी नेकपासँग प्रश्न गरेको छ ।

‘प्रधानमन्त्री पद देशको संस्कार, संविधान र संवेदनशीलताभन्दा पर व्यक्तिगत सनकको कैदी बन्न मिल्दैन । संस्थागत जिम्मेवारीभन्दा अलग निर्दलीय आधिपत्य प्रधानमन्त्री पदमा संविधानले परिकल्पना गरेको छैन,’ विज्ञप्तिमा भनिएको छ, ‘अतः प्रधानमन्त्रीको सोच, शैली, अभिव्यक्ति र व्यवहार सम्पूर्ण रूपले बदल्ने या प्रधानमन्त्री नै बदल्ने, उहाँकै दल नेकपाको विषय हो, तर २ प्रश्न– देशको प्रधानमन्त्रीको अभिव्यक्ति नेपाल सरकारकै संस्थागत अभिव्यक्ति हो कि होइन ? अनि उहाँको दल नेकपा पार्टीको विश्वास बमोजिमको हो कि होइन ? संस्थागत प्रस्टीकरण अनिवार्यसँग आवश्यक भएको छ ।’

कांग्रेसले प्रधानमन्त्रीका पछिल्ला अभिव्यक्ति र व्यवहारप्रति गम्भीर विमति प्रकट गर्दै यसबारे सरकार र नेकपाको संस्थागत धारणा सार्वजनिक हुनुपर्ने माग गरेको छ । 

हेर्नुहोस्, विज्ञप्ति :


 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्