अमेरिका र चीनको दुश्मनीले विश्व खतरामा

अमेरिकाले चीनविरुद्धको शक्तिसंघर्ष चर्काइरहँदा सानो दुर्घटनाले पनि विनाशकारी युद्ध गराउन सक्ने वर्ल्ड एड्भान्स्ड रिसर्च प्रोजेक्टका संयोजक डा हाइन्ज डाइट्रिचले बताएका छन् । 

विगत केही महिनायता वाशिङटनले सिनजियाङ, ताइवान र दक्षिण चीन सागरका विषयमा चीनविरोधी बयान चर्काएको छ । त्यससँगै उसले प्रतिबन्धको नीतिलाई पनि अघि बढाएको छ र चिनियाँ कम्युनिस्ट पार्टीको निन्दा गरिरहेको छ । 


Advertisement

अहिलेको परिस्थिति दोस्रो विश्वयुद्ध अघिको युरोपको जस्तै भएको डाइट्रिच बताउँछन् । 

‘तर अहिले स्थिति पहिलेको भन्दा निकै खतरनाक छ किनकि अहिले धेरै राज्यहरूसँग नाजीहरूले कल्पना गरेभन्दा बढी विनाशक शक्ति छ । आणविक, जैविक, साइबर र अन्तरिक्ष सबै किसिमका युद्धमा व्यापक विनाश गराउने प्रविधि बनेका छन् ।


Advertisement

अहिलेको शत्रुता राजनीतिक र आर्थिक मात्र नभई विचारधारात्मक पनि भएको उनी बताउँछन् । अगस्ट ५ मा वाशिङटन एक्जामिनरसँग कुरा गर्दै अमेरिकाको परराष्ट्र मन्त्रालयका विशेष प्रतिनिधि साम ब्राउनब्याकले चिनियाँ कम्युनिस्ट पार्टीलाई ट्रम्प प्रशासनले वैध प्रणाली नमान्ने बताएका छन् ।

अमेरिका र चीनको शासन प्रणालीमा गुणात्मक र संरचनात्मक भिन्नता रहेको डाइट्रिचको भनाइ छ । ती दुवै परिपूर्ण नरहेको उनी बताउँछन् । तर अमेरिकाका नीतिनिर्माताहरूले मन नपराए पनि चिनियाँ जनताको नजरमा चिनियाँ कम्युनिस्ट पार्टीको वैधतामा प्रश्न छैैन । उनीहरू पार्टीले सबैको हित तथा सार्वजनिक सुव्यवस्था कायम गरेको धारणा राख्छन् । 

ट्रम्पले लगभग युद्धको नीति ल्याएर ऊर्जा, अर्थ र उच्च प्रविधिको क्षेत्रमा अमेरिकाको विश्वव्यापी सर्वोच्चतालाई कायम गर्न चाहेको र त्यसले गर्दा चीनसँग गोली हानाहानको स्थिति आउन सक्ने र त्यसले अकल्पनीय परिणाम ल्याउने चेतावनी उनी दिन्छन् । 

रुस र चीनले साझेदारी बढाइरहेको अवस्थामा युरोपेली संघ अमेरिकी इच्छाका अगाडि झुक्ने कि चीनसँग पारस्परिक हित हुने किसिमको प्राविधिक तथा आर्थिक सहकार्य गर्ने भन्ने विषयमा दोधारमा छ । 

संघको सबभन्दा शक्तिशाली मुलुक जर्मनीलाई वाशिङटनले रुसी नेतृत्वको नोर्ड स्ट्रीम २ ग्यास पाइपलाइन तथा चीनको हुुआवेको ५जी टेलिकम संरचना परियोजना त्याग्न दबाब दिइरहेको छ । अहिलेसम्म बर्लिन कुनै पनि परियोजनालाई अस्वीकार गर्न हिचकिचाइरहेको छ । 

रुस र चीनले रणनीतिक साझेदारी मजबूत बनाउनुपर्ने किनकि यसले अमेरिका र उसका साझेदारका शत्रुतापूर्ण गतिविधिलाई मत्थर पार्ने डा डाइट्रिचको भनाइ छ । 

उनी अमेरिका, चीन, रुस र जर्मन नेतृत्वको युरोपेली संघलाई विश्व राजनीतिका गुरुत्वाकर्षण केन्द्र मान्छन् । 

अहिले विश्व व्यवस्था अस्थिर रहेकाले यसमा गुणात्मक परिवर्तन आउनुपर्ने उनी बताउँछन् । सम्पूर्ण मानवजातिका लागि लोकतान्त्रिक पर्यावरणीय सभ्यता निर्माणमा जोड दिनुपर्ने उनको भनाइ छ । 
 

स्पुतनिक न्युजबाट
 

एजेन्सी
एजेन्सी

लेखकबाट थप...

कमेन्ट गर्नुहोस्