कर्णालीमा निर्बाध चल्दैछन् ‘ठग यातायात’ : यात्रुबाट टिकट विनै ५ हजारसम्म भाडा असुली

शेरबहादुर थापा
शेरबहादुर थापा

लोकान्तर संवाददाता थापा कर्णाली प्रदेशबाट रिपोर्टिङ गर्छन् ।

कालिकोटको खाँडाचक्र नगरपालिका–६ का रमेश विश्वकर्मा ३ दिनअघि कर्णाली प्रदेशको राजधानी वीरेन्द्रनगरबाट कालिकोट फर्किए । अन्तरजिल्ला यातायात सरकारले बन्द गरेको बेला उनले भने चर्काे भाडादरमा सार्वजनिक यातायातमा यात्रा गर्न पाए ।

वीरेन्द्रनगरस्थित काँक्रेविहार यातायात प्रालिको काउन्टरमा सम्पर्क गर्दा ५ हजार रुपैयाँ तिरेर कालिकोट पुग्न सफल भइएको उनी बताउँछन् । 


Advertisement

‘मलाई घर जानैपर्ने बाध्यता थियो । काउन्टरमा ५ हजार मागेपछि मैले अलि मिलाउनुस् भने । तर ५०० पहिल्यै छुट गरिसकेको र अब कम नहुने भन्दै पूरै ५ हजार लिए,’ उनले भने ।

अत्यावश्यक अवस्थामा परेका र चर्काे भाडा तिर्न सक्नेहरू यात्रा गरिरहे पनि कतिपय सोधपुछमै सीमित हुन्छन् । दैलेखको आठबीस नगरपालिका–४ का अग्र सिजापति काउन्टरको सम्पर्कमा पुगे पनि चर्काे भाडादर सुनेपछि राकम कर्णाली गएनन् ।


Advertisement

जुम्लाको चन्दननाथ गाउँपालिका–३ का सर्जन शाहीले पनि चर्काे भाडादर सुनेपछि घर जाने योजना स्थगित गरेका छन् । वीरेन्द्रनगरमा सिकर्मी काम गर्ने शाही लकडाउनपछि फुर्सदिला छन् । तर घर जान पाएका छैनन् । ‘हामी गरीबका लागि मात्रै सरकारले लकडाउन नलगाइदिए हुन्थ्यो । कम्तिमा दोब्बर भाडा तिर्न हामी तयार छौं । यहाँ चौबल भाडा असुल्न थालेका छन्,’ उनले गुनासो गरे ।

संवाददाता स्वयं सोमवार बिहान ११ बजे वीरेन्द्रनगर बसपार्कमा पुग्दा काँक्रेविहार यातायात प्रालिको काउन्टरमा दैलेखको आठबीस नगरपालिका–४ राकम कर्णालीका लागि साँझ ५ बजे गाडी जाने जानकारी पाइयो । काउन्टरका कर्मचारी कमल विश्वकर्माले प्रतिव्यक्ति २ हजार ५०० रुपैयाँका दरले ३ जनाको ७ हजार ५०० हुने र त्यसमा ५०० रुपैयाँ छुट दिने बताए ।

बसपार्कको एक काउन्टरमा काम गर्दै आइरहेका नाम नबताउने कर्मचारीले प्रहरीसँगको मिलेमतोमा हरेक दिन हाइसहरू दैलेखतर्फ गइरहेको बताए । ‘हरेक दिन साँझ ४ बजेदेखि ५ बजेको समयमा हाइसहरू जाने गर्छन् । सुर्खेतको सीमासम्म जाने भन्दै प्रहरीको मिलेमतोमा गाडी दैलेख जाने गरेका छन्,’ उनले भने ।

कोरोना भाइरस संक्रमण रोकथामका लागि संघीय सरकारले नै देशभर अन्तरजिल्ला यातायात बन्द गरेको छ । यतिबेला केही सार्वजनिक यातायात सँगसँगै निजी नम्बर रातो प्लेटका सवारीसाधनले समेत यात्रुबाट चर्काे भाडा लिइरहेका छन् ।

काँक्रेविहार यातायात प्रालिका अध्यक्ष लोगबहादुर थापाले प्रायः दिन बेलुकी लुकीछिपी गाडीहरू दैलेख, कालिकोट लगायत जिल्ला जाने गरेको बताए । ‘यसमा समिति जिम्मेवार हुँदैन, गाडी मालिककै जिम्मा हुने गरी चलिरहेका छन्,’ उनले भने, ‘मेरै गाडी त २७ हजार ३०० रुपैयाँ तिरेर छुटाएको हो । मौखिक रूपमा कसले कति भाडा लिन्छ थाहै हुँदैन । अनुहार हेरेर भाडा लिइरहेका छन् ।’

जिल्ला प्रहरी कार्यालय सुर्खेतका प्रमुख एसपी राजेन्द्र भट्टले गाडी जिल्लाभित्र मात्रै जोरबिजोरमा सञ्चालन भइरहेको बताउँदै अन्य जिल्लामा नगएको दाबी गरे । ‘मलाई यसबारेमा तपाईंले भनेपछि मात्रै थाहा भयो, म आजैदेखि टीम खटाउँछु । यात्रुलाई सोधेर मात्रै पठाउने र पत्ता लागेको खण्डमा कानून बमोजिम कारवाही गर्छु,’ उनले भने ।

सुर्खेतका प्रमुख जिल्ला अधिकारी हिरालाल रेग्मीले लकडाउन शुरू भएयता कुनै पनि सवारीसाधनलाई यात्रु बोक्न भनेर पास नदिइएको बताए । ‘विशेष अवस्थामा अत्यावश्यक कामका लागि अन्य जिल्लासँगको समन्वयमा हामीले पास दिइरहेका छौं,’ उनले भने, ‘कुनै पनि सवारीसाधनलाई हामीले भाडा लिने गरी यात्रु ओसार्न दिएका छैनौं । पास विना कोही जान्छ भने त्यसलाई कारवाही गर्छौं ।’

शेरबहादुर थापा
शेरबहादुर थापा

लेखकबाट थप...

कमेन्ट गर्नुहोस्