कोरोनाकालमा होडबाजी : गाउँगाउँ पुगेर नेकपामा कार्यकर्ता भित्र्याउँदै मुख्यमन्त्री शाही

शेरबहादुर थापा
शेरबहादुर थापा

लोकान्तर संवाददाता थापा कर्णाली प्रदेशबाट रिपोर्टिङ गर्छन् ।

गत साउन २५ गते नेपाली कांग्रेस जाजरकोटले भेरी नगरपालिका–६ मा प्रशिक्षण कार्यक्रमको आयोजना गर्‍यो । जहाँ ७४ जना राजनीतिक कार्यकर्ता पार्टी प्रवेश गरेको कांग्रेसले जनायो ।

त्यतिबेलै नेकपाले पनि जाजरकोटको नलगाड नगरपालिका–२ मा पार्टी प्रवेश कार्यक्रम भव्यताका साथ गर्‍यो । 


Advertisement

देशैभर कोरोना भाइरस संक्रमणको संकट रहेका बेला नेकपा र कांग्रेसले राजनीतिक गतिविधि गर्दै पार्टी प्रवेशको होडबाजी गरिरहेका छन् । होडबाजीमा दौडिरहेका छन्, कर्णाली प्रदेशका मुख्यमन्त्री महेन्द्रबहादुर शाही लगायत नेताहरू ।

४ दिनअघि दैलेखको भैरबी गाउँपालिका–३ मा नेकपा वडा कमिटीको आयोजनामा गरिएको पार्टी सम्पर्क कार्यालय उद्घाटनको कार्यक्रममा प्रदेशसभा सदस्य सुशील थापाले ४५ जनालाई नेकपामा प्रवेश गराए । कार्यक्रममा उनीमाथि कांग्रेस पक्षधर कार्यकर्ताले हातपातको समेत प्रयास गरेको खबर सार्वजनिक भयो ।


Advertisement

त्यो घटना सेलाउन नपाउँदै कालिकोटमा मुख्यमन्त्री महेन्द्रबहादुर शाहीले राप्रपाका एक जना चर्चित नेतालाई नेकपा पार्टीमा प्रवेश गराए । कालिकोटमा जाँदा मुख्यमन्त्री शाहीसँगै सरकारका आन्तरिक मामिला तथा कानून मन्त्री नरेश भण्डारी, सामाजिक विकास मन्त्री दल रावल पनि थिए । उनीबाहेक करीब आधा दर्जन पत्रकार, करीब २ दर्जन कार्यकर्ता पनि दलबलमा सहभागी थिए । यतिधेरै व्यक्तिहरू सामूहिक रूपमै सुर्खेतबाट कालिकोट गएका हुन् ।

जब मुख्यमन्त्री शाहीको टोली जुम्ला पुग्यो, तब सहभागी संख्या ५० जनासम्म पुग्यो । हरेक जिल्लाबाट टोलीमा नेता–कार्यकर्ता थपिँदै गए ।

केही दिनअघि नै नेपाली कांग्रेसका केन्द्रीय सदस्य हृदयराम थानीले वीरेन्द्रनगर नगरपालिका–६ का २ जना युवालाई कांग्रेसमा प्रवेश गराए । सरकारले राजनीतिक भेला र भीडभाड नगर्नू भनेर निषेध गरेको अवस्थामा समेत नेकपाका मुख्यमन्त्री र प्रतिपक्षी दलका कांग्रेसबाट राजनीतिक गतिविधि भइरहेका छन् ।

नेपाली कांग्रेसका केन्द्रीय सदस्य एवं पूर्व मन्त्री जीवनबहादुर शाहीले कांग्रेस पार्टीले एकाध स्थानमा सामाजिक दूरी सहितका कार्यक्रम गरेपनि सत्तापक्षको जस्तो भीडभाड गर्ने काम नभएको दाबी गरे । ‘अहिले सरकार नै दलबलसहित हिमाली जिल्ला घुमिरहेको छ, कर्णाली सरकारसँग कोरोना डराएको हो कि भन्ने लागिरहेको छ,’ उनले भने, ‘नेकपाकै सरकार केन्द्र र प्रदेशमा भएको समयमा आफ्नै दलको सरकारले सामाजिक दूरी कायम गर्नु भनेको समयमा नेकपाको यो हर्कत जनतासामु छर्लङ्ग देखापरेको छ ।’

नेकपा कर्णाली प्रदेश अध्यक्ष गोरख बोगटीले पार्टीको नीति धेरै भीडभाड नगर्ने रहेको बताए । प्रदेश सरकारका मन्त्रीले सानो टीममा योजना अनुगमन गर्न, बाढीपहिरो पीडितलाई भेट्न जान पाइने भए पनि अहिले सामाजिक सञ्जालमा आएका तस्वीर जस्तै भीडभाड गर्न अनुपयुक्त हुने उनले बताए ।

‘हिमाली जिल्लामा कोरोना संक्रमण नदेखिएको भन्दै उहाँहरू गए पनि त्यसले पर्याप्त अस्पताल नभएका स्थानका नागरिकमा कोरोना फैलिँदा खतरा बढ्न सक्नेतर्फ ध्यान दिनु आवश्यक छ,’ उनले भने ।

शेरबहादुर थापा
शेरबहादुर थापा

लेखकबाट थप...

कमेन्ट गर्नुहोस्