जैमिनीमा गर्भवतीका लागि ‘ग्रामीण भिडियो एक्सरे’ सेवा सञ्चालन

प्रतिकात्मक तस्वीर

बागलुङको जैमिनी नगरपालिकाले गर्भवती महिलाका लागि ग्रामीण भिडियो एक्सरे (अल्ट्रासाउन्ड) सेवा सञ्चालनमा ल्याएको छ । 

टाढाको ग्रामीण क्षेत्रबाट नगरपालिका आउन नसक्ने गर्भवती महिलालाई सहज रूपमा भिडियो एक्सरे सेवा उपलब्ध गराउन यो सेवा सञ्चालनमा ल्याइएको हो ।


Advertisement

कुश्मीशेरा बजार तथा टाढाका कुनै पनि स्वास्थ्य संस्थामा जान नसकेको अवस्थामा तालिम प्राप्त स्वास्थ्यकर्मीले गाउँघरमा नै पुगेर गर्भवती महिलालाई भिडियो एक्सरे सेवा प्रदान गर्नेछ । 

पहिलो चरणमा नगरपालिका–३ स्थित उपल्लो दमेक, वडा नम्बर ७ स्थित जैदी, वडा नम्बर ८ स्थित छिस्ती र वडा नम्बर १० स्थित रांखानी स्वास्थ्य संस्थाबाट यो सेवा सञ्चालनमा ल्याएको नगरपालिका स्वास्थ्य शाखा प्रमुख गोविन्द आचार्यले जानकारी दिए ।


Advertisement

यसअघि नगरपालिका गर्भवती महिलालाई प्राथमिक स्वास्थ्य केन्द्र कुश्मीशेराले मात्रै ‘भिडियो एक्स–रे’ सेवा प्रदान गर्दै आएको थियो । 

कार्यक्रमका लागि स्वास्थ्य तथा जनसंख्या मन्त्रालयको शसर्त अनुदान १ लाख र नगरपालिकाको ३ लाख गरी कूल ४ लाख वजेट विनियोजन गरिएको छ । विगतको तुलनामा अत्याधिक महिलाहरु ग्रामीण भिडियो एक्सरे सेवामा सहभागी भएका छन् । असोजको पहिलो सातादेखि कार्यान्वयनमा ल्याइएको यो कार्यक्रमअन्र्तगत हालसम्म ४५ जना गर्भवती महिलाले सेवा प्राप्त गरेका छन् । 

‘सबैको पहुँचमा सूचना नपुगेको पनि हुन सक्छ,’ स्वास्थ्यकर्मी सुनिता चालिसे भनिन्, ‘यो सेवा प्रभावकारी हुने देखियो, यसप्रति धेरै गर्भवती महिला उत्साहित हुनुहुन्छ ।’ गर्भवती महिलाले ४ पटक गर्भ जाँच गर्नुपर्छ । स्वास्थ्य शाखाले हरेक ३ महिनामा घुम्तीसेवा सञ्चालन गर्ने योजना बनाएको छ । 

गाउँघरमा यो सेवा नहुँदा यहाँका महिलालाई निकै समय र पैसा खर्च गरेर गर्भ जाँच गराउन बुटवल, पोखरा तथा धौलागिरी अञ्चल अस्पताल बागलुङमा जानुपर्ने बाध्यता थियो । स्थानीय स्वास्थ्य चौकीमा नियमित रूपमा गर्भ जाँच गराउने महिला पनि भिडियो एक्सरे सेवामा सहभागी हुने भएको छ । गर्भमा रहेको बच्चाको स्वास्थ्य अवस्था थाहा पाउन भिडियो एक्स–रे गर्न टाढा धाउनुपर्ने बाध्यता अन्त्य हुँदा निकै खुशी लागेको जैमिनी–८ छिस्तीकी गर्भवती रमादेवी रेग्मीले बताइन् ।

‘वर्षायाममा गाउँको बाटो अप्ठ्यारो, कोरोनाको डर, बागलुङ बजार कसरी जानेहोला भन्ने चिन्ता लागेको थियो,’ उनले भनिन्, ‘अहिले गाउँकै स्वास्थ्य चौकीमा यो सेवा लिन पायौं । निकै सहज भयो, पैसाको बचतसँगै जोखिम पनि मोल्नुपरेन ।’ 

कमेन्ट गर्नुहोस्