ठूला निजी अस्पताललाई कोभिड अस्पतालमा रुपान्तरण गरियोस्ः मुख्य सचेतक भट्टराई

नेपाल कम्युनिस्ट पार्टी (नेकपा) का राष्ट्रियसभा तर्फका मुख्य सचेतक खिमलाल भट्टराईले ठूला निजीअस्पतालहरुलाई कोभिड अस्पतालका रुपमा रुपान्तरण गर्नुपर्ने आवश्यकता औँल्याएका छन् । राजधानीका ग्राण्डी, ह्याम्स, नर्भिक, मेडिसिटी जस्ता सुविधासम्पन्न ठूला निजी अस्पताललाई कोभिड अस्पतालमा रुपान्तरण गरिनुपर्ने उनको जोड छ ।

‘दिनहुँ कोरोना संक्रमित बढेको बढ्यै छन् । बिरामीहरु आईसीयू र भेन्टिलेटर नपाएर मर्ने अवस्थाको सृजना हुँदैछ । यसतर्फ गम्भीर बन्दै ठूला निजी अस्पताललाई सरकारले लिएर कोभिड अस्पतालमा रुपान्तरण गर्नुपर्छ’, लोकान्तरसँग उनले भने, ‘यसमा निजी अस्पतालले पनि सहजीकरण गर्नुपर्छ, सरकारले छलफल चलाउनुपर्छ ।’


Advertisement

प्रमुख सचेतक भट्टराईले सरकारी अस्पतालहरुमा पनि आईसीयू र भेन्टिलेटरहरु बढाउनुपर्नेमा जोड दिँदै यस्तो अवस्थामा सरकारले सम्पूर्ण ध्यान नागरिकलाई बचाउनेतर्फ सोच्नुपर्ने बताए ।
आफ्नो सरकारका जिम्मेवार अधिकारीसँग कोरोना नियन्त्रणमा खेल्नुपर्ने भूमिका सन्दर्भमा निरन्तर छलफल भइरहेको भन्दै उनले सरकारले केही कमजोरीका बीच पनि काम भने राम्रो गरेको दावी गरे ।

‘सरकारका पदाधिकारीसँग मेरो कोरोना नियन्त्रणका सन्दर्भमा निरन्तर कुरा भइरहेको छ । सामाजिक रुपमा पनि लागिपरेकै छु’, उनले भने, ‘अहिले जति काम भइरहेको छ। यो गतिलाई थप बढाउनु जरुरी छ ।’
उनले कोरोना संक्रमण समूदायसम्मै फैलिसकेको देखिएको भन्दै यस्तो बेला सरकारले विकास निर्माणका काम भन्दा पनि स्वास्थ्य पूर्वाधार खडा गर्नतर्फ लाग्नुपर्नेमा जोड दिए ।


Advertisement

पछिल्लो समय काठमाडौं उपत्यकासहित देशभर कोरोना संक्रमितको अस्पतालको बेड समेत नपाएको गुनासो आएको छ भने आईसीयू र भेन्टिलेटरको त थप अभाव हुँदा संक्रमितले अकालमै ज्यान गुमाउनु पर्ने अवस्थाको सृजना हुने खतरा बढेको छ ।

बुधबारसम्म देशभर कोरोनाको सक्रिय संक्रमितको संख्या ३८ हजार ७०० नाघिसकेको छ । काठमाडौंमा मात्रै २१ हजारको हाराहारीमा सक्रिय संक्रमित रहेका छन् ।

 

 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्