प्रतिष्ठानमा ३९ दिनदेखि तालाबन्दी

प्रतिकात्मक तस्वीर

कर्णाली स्वास्थ्य विज्ञान प्रतिष्ठान जुम्लाको प्रशासन तथा शैक्षिक कार्यक्रम ३९ दिनदेखि सबै ठप्प छन् ।

प्रतिष्ठानका उपकूलपति प्रा.डा. राजेन्द्रराज वाग्लेले १ महिनाअघि असोज २६ गते प्राध्यापक मुन्निराज क्षेत्रीलाई प्रतिष्ठानको डिनमा नियुक्त गरेको विरोधमा असोज २८ गतेदेखि तालाबन्दी भएको हो ।


Advertisement

उपकूलपति प्रा.डा. वाग्लेले प्रतिष्ठानको डिनमा सरस्वती गौतमलाई नियुक्ति गरिसकेपछि दोस्रो डिनका रूपमा केशर रानालाई गरेको र फेरि पनि तेस्रो डिनका रूपमा असोज २६ मुनिराज क्षेत्रीलाई नियुक्ति दिएका थिए । डिन नियुक्तिमा एकाधिकार लादेर अधिकारको दुरुपयोग गरी संस्थालाई आर्थिक व्ययभार पारेको भन्दै त्यसको विरोधमा प्रतिष्ठानको कर्मचारी कल्याणकारी समाजले तालाबन्दी जारी राखेको छ ।

तालाबन्दी खुल्ने वा नखुल्ने अहिलेसम्म कुनै अत्तोपत्तो छैन तर प्रतिष्ठानका कर्मचारीले भने तिहारमा समेत तलब खान पाएका छैनन् । कल्याणकारी समाजले उपकूलपतिले नियुक्त गरेका तेस्रो डिन फिर्ता लिनुपर्ने माग गरेको छ । डिनसहित राखिएका मागबारे छलफल गर्न उपकूलपति प्रा.डा. वाग्लेले खटाएको प्रतिष्ठान प्रतिनिधिमण्डलले कल्याणकारी समाजसँग पटक–पटक वार्ता गरे पनि त्यसको उचित निकास निस्कन सकेको छैन ।


Advertisement

प्रतिष्ठान केन्द्रीय कार्यालयमा २ हप्ताअघि पुगेका उपकूलपति प्रा.डा. वाग्ले समाजसँग आफैं बसेर निकास निकाल्ने, तालाबन्दी खोल्ने र शैक्षिक तथा प्रशासनिक अस्तव्यस्ततालाई सुल्झाउन रत्ति पनि चासो नदेखाएको आरोप कल्याणकारी समाजका अध्यक्ष रमाकान्त उपाध्यायले लगाए ।

नेपाल पत्रकार महासंघ जुम्लाले उपकूलपति प्रा.डा. वाग्ले स्वयं केन्द्रीय कार्यालयमा पुगेको २ हप्ता बढी भइसक्दा पनि प्रतिष्ठानमा ३९ दिनसम्म भएको तालाबन्दी खोल्न चासो नदेखाएको र यहाँ कार्यरत ३५० कर्मचारीलाई तिहारजस्तो समयमा तलब खानबाट वञ्चित गराएको भन्दै ध्यानाकर्षण गरेको छ ।

प्रतिष्ठानको नेतृत्वले फोन समेत नउठाएर सूचना लिने अधिकारबाट वञ्चित गरेको भन्दै ३–३ डिन नियुक्तिले प्रतिष्ठानलाई भर्तिकेन्द्र बनाउने र आर्थिक व्ययभार पार्ने कुराले ध्यानाकर्षण भएको महासंघका अध्यक्ष बरमबहादुर महतले बताए । यसबारे उपकूलपति प्रा.डा. वाग्लेलाई बारम्बार फोन गरे पनि उठ्न सकेन ।

कमेन्ट गर्नुहोस्