राष्ट्रिय वाणिज्य बैंक र चौरजहारी नगरपालिकाबीच सम्झौता

पूर्व गृह र ऊर्जा तथा जलस्रोत मन्त्री तथा संघीय संसदका सांसद जर्नादन शर्माको उपस्थितिमा राष्ट्रिय वाणिज्य बैंक लिमिटेड र रुकुम पश्चिम जिल्लाको चौरजहारी नगरपालिकाबीच सहुलियतपूर्ण कर्जामा सहकार्य गर्ने सम्बन्धमा बुधवार काठमाडौंमा सम्झौता भएको छ ।

सम्झौता पत्रमा बैंकका प्रमुख कार्यकारी अधिकृत किरणकुमार श्रेष्ठ र चौरजहारी नगरपालिकाका नगर प्रमुख विशाल शर्माले हस्ताक्षर गरेका छन् ।


Advertisement

सम्झौतापछि नगरपालिकाले सहुलियतपूर्ण कर्जाका लागि ब्याज अनुदान सम्बन्धी एकीकृत कार्यविधि २०७५ (संशोधन समेत) अन्तर्गत व्यावसायिक कृषि तथा पशुपन्छी कर्जा कार्यान्वयनका लागि उद्यम तथा व्यवसाय गर्न सम्भाव्य र इच्छुक समूहलाई परामर्श तथा उद्यमशीलता सम्बन्धी आवश्यक तालिमको व्यवस्थापन गर्ने र तालिम प्राप्त कृषकको ५–५ जनाको समूह बनाई सहकार्य समूह, उद्यमी, फर्म, कम्पनी तथा सहकारीलाई कर्जाका लागि बैंकको शाखामा सिफारिस गर्नेछ ।

नगरपालिकाले सिफारिश गरेका उद्यमीलाई बैंकले नियमअनुसार प्रत्येक समूहलाई अधिकतम १० लाख रुपैयाँसम्म सहुलियपूर्ण कर्जा अन्तर्गत कर्जा लगानी गर्नेछ । 


Advertisement

समारोहमा माननीय जर्नादन शर्माले देश स्रोतसाधनमा धनी हुँदाहुदै पर्याप्त परिचालन नभएकाले गरीबीमा बस्नुपरेको हुँदा बैंकको कर्जाले स्रोतसाधनको परिचालनमा महत्त्वपूर्ण योगदान गर्ने बताए । उनले विदेशीका धेरै विकासका मोडल देखेको तर नेपालको माटो सुहाउँदो आर्थिक मोडलका रूपमा सहुलियतपूर्ण कर्जा बन्न सक्ने बताए ।

बैंंकका प्रमुख कार्यकारी अधिकृत किरणकुमार श्रेष्ठले बंगलादेशबाट शुरू भएको सामूहिक जमानीको आधारमा लगानी गरिने लघुवित्त कर्जा मोडल जस्तै सहुलियतपूर्ण कर्जा नेपालको लागि नयाँ आर्थिक मोडल बनाउनुपर्ने बताए । उनले देशको उत्पादन वृद्धि तथा गरीबी न्यूनिकरणको लागि सहुलियतपूर्ण कर्जालाई नमूनाको रूपमा लैजान सके देशलाई छिट्टै समृद्धिसँग जोड्न सकिने बताए ।

उनले राष्ट्रिय वाणिज्य बैंकले विभिन्न शीर्षकमा १६६० जनालाई १ अर्ब २८ करोड रुपैयाँभन्दा बढी विना धितो सहुलियतपूर्ण कर्जा लगानी गरिसकेको बताए । राष्ट्रिय वाणिज्य बैंकले मात्रै बैंकिङ क्षेत्रमा भएको सहुलियतपूर्ण कूल कर्जा लगानीको ५० प्रतिशतभन्दा बढी कर्जा लगानी गरिसकेको उनले बताए । नगर प्रमुख विशाल शर्माले नगरवासीको गरीबी न्यूनिकरण गरी जीवनस्तर उकास्न यो सहकार्य फलदायी हुने बताए ।

कार्यक्रममा राष्ट्रिय सभाका माननीय सांसद ठगेन्द्र पुरी, कर्णाली प्रदेश सरकारका सल्लाहकार अर्थविद् डा. सुरेन्द्र उप्रेती, जिल्ला समन्वयन समिति, रुकुम पश्चिमका संयोजक राजकुमार शर्मा, बैंकका उपकार्यकारी अधिकृतद्धय सरस्वती अधिकारी, देवेश प्रसाद लोहनी, विभागीय प्रमुख राज्य लक्ष्मी खड्गी, कम्पनी सचिव भोलानाथ पौडेल, अन्य कर्मचारीहरू लगायतको उपस्थिति रहेको थियो ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्