तारकेश्वर नगरपालिकाको न्यायिक समितिमा ४०० उजुरी

तारकेश्वर नगरपालिकाको न्यायिक समितिमा चालू आर्थिक वर्षको पहिलो ६ महिनामा ४०४ उजुरी दर्ता भएका छन् । 

चालू आवमा ४०४ उजुरी दर्ता भएकामा २१ वटा जग्गा विवादको मुद्दा परेका छन् ।


Advertisement

अधिकांश उजुरी साँध सिमाना, एउटाको जग्गा अर्काले मिचेको जस्ता उजुरी नगरपालिको न्यायिक समितिमा पर्ने गरेको न्यायिक समितिको संयोजक तथा उपप्रमुख भवानी डोटेल (धिताल) ले बताइन् । उनका अनुसार चालू आवमा ६ सिमाना विवाद, ७ सार्वजनिक जग्गा/बाटोसम्बन्धी, २ महिला तथा बालबालिका हिंसासम्बन्धी, जग्गा विवादका २१ र अन्य विविध विषयका ३८ उजुरी नगरपालिको न्यायिक समितिमा परेको छ । जसमा १७ वटा सहमति भएका छन् । २७ फैसला भएका, २ मुल्तबीमा राखिएको र ५८ प्रक्रियामै रहेको छ । 

आव २०७६/७७ मा ९६ उजुरी दर्ता भएकामा २४ जग्गा विवाद, २० सार्वजनिक जग्गा/बाटो सम्बन्धी, ४ सिमाना विवाद, ३ महिला तथा बालबालिका हिंसासम्बन्धी र अन्य ४५ उजुरी दर्ता भएका छन् ।


Advertisement

यस अवधिमा ४४ मुद्दा किनारा लगाइएको छ । ११ उजुरी मेलमिलाप तथा सहमति भएका, २ उजुरी मुल्तबीमा राखिएको ३९ प्रक्रियामा रहेको उपप्रमुख डोटेलले बताइन् ।

घरेलु हिंसा र महिला हिंसाका उजुरीहरू नगरपालिकाको न्यायिक समितिमा अत्यन्त कम पर्ने गरिएको छ । सामाजिक परिवेश तथा चेतनाको कमीले पनि यस्ता खालको उजुरीहरु बाहिर ल्याउन हुन्न भन्ने मान्यताले उजुरी थोरै पर्ने गरेको बताइएको छ । व्यक्तिगत तथा घरेलु हिंसाका उजुरी नगरपालिकाको न्यायिक समितिमा नपरे पनि घरजग्गा विवाद, सम्बन्धविच्छेद, घर निर्माण विवाद र ठगी–लेनदेनका उजुरी न्यायिक समितिमा पर्ने गरेका छन् । 

आव २०७५/७६ मा ८१ वटा उजुरी दर्ता भएकामा २८ जग्गा विवादसम्बन्धी उजुरी परेको थियो । ९ सार्वजनिक जग्गा तथा बाटोसम्बन्धी, १९ सिमाना विवाद, २ सम्बन्धविच्छेद र एउटा महिला तथा बालबालिका हिंसासम्बन्धी उजुरी न्यायिक समितिमा दर्ता भएका थिए । सो अवधिमा ३१ उजुरी न्यायिक समितिबाट फैसला गरिएको, २० सहमति भएका, ४९ प्रक्रियामै रहेको र एउटा मुल्तबीमा राखिएको थियो । 

चालू आवमा पनि न्यायिक समितिका उजुरीहरू आउने क्रम बढिरहेको नगरपालिकाले जनाएको छ । नगरपालिकामा आउने उजुरीहरू सबै लिखित रूपमै आउने गरेका छन् । उपप्रमुख डोटेलको संयोजकत्वमा रहेको समितिमा २ जना कानून व्यवसायी सदस्य छन् । समितिले दर्ता भएका मुद्दाको सुनुवाइका लागि प्रत्येक सोमवार र बिहीवार इजलास राख्दै आएको छ ।

कमेन्ट गर्नुहोस्