नेकपाका दुवै पक्षले निर्वाचन आयोगलाई बुझाए जवाफ, कुन पक्षको जिकिर कस्तो ?

पार्टीको आधिकारिकतासम्बन्धी विवादमा नेकपाका दुवै पक्षले निर्वाचन आयोगलाई जवाफ पठाएका छन् ।

आयोगले दिएको सात दिने म्यादको अन्तिम दिन केपी शर्मा ओली समूह र पुष्पकमल दाहाल 'प्रचण्ड'–माधवकुमार समूहले आयोगलाई जवाफ पठाएका हुन् ।


Advertisement

निर्वाचन आयोगले दुवै पक्षबाट जवाफ प्राप्त भएको जनाएको छ ।

स्रोतका अनुसार नेकपा ओली समूहका अध्यक्ष एवं प्रधानमन्त्री केपी शर्मा ओलीले पार्टी विभाजन नै नभएको जिकिर गरेका छन् ।


Advertisement

अर्को समूह भनिएका प्रचण्ड पार्टीको अध्यक्ष र माधव नेपाल वरिष्ठ नेता कायम रहेको जवाफ ओलीले दिएका छन् ।

आफू नै पार्टीको पहिलो वरीयताको अध्यक्ष रहेको र आफ्नै नेतृत्वमा पार्टी कायम रहेको जिकिर ओलीको छ ।

उता प्रचण्ड-नेपाल पक्षले भने आयोगले मागेका कागजात र विवरण आफूहरूले पहिले नै पठाइसकेको जवाफ आयोगलाई दिएको स्रोतको दाबी छ ।

उक्त पक्षले आयोगलाई संवैधानिक अंगको धर्म नबिर्सिन र त्यसले पार्न सक्ने दूरगामी असरका बारेमा सोच्न आग्रह गरेको छ ।

मन्त्रिपरिषद्को सिफारिशमा राष्ट्रपति विद्यादेवी भण्डारीले प्रतिनिधि सभा विघटन गर्दै आगामी वैशाख १७ र २७ गतेका लागि मध्यावधि निर्वाचन घोषणा गरेपछि नेकपा विभाजनको अवस्थामा पुगेको छ ।

दुवै पक्षले आ-आफ्नो तर्फबाट पत्र र निर्णयहरू अभिलेखीकरणका लागि निर्वाचन आयोगलाई बुझाउँदै आएका छन् ।

प्रचण्ड–नेपाल पक्षले झण्डै दुईतिहाइ केन्द्रीय सदस्य आफूहरूसँग रहेकाले आफूहरू नै मूल नेकपा भएको दाबी गर्दै आएको छ भने ओली पक्षले पहिलो वरीयताको अध्यक्ष र महासचिव विनाका बैठकहरू आधिकारिक नहुने जिकिरसहित आफूहरू आधिकारिक पक्ष भएको दाबी गर्दै आएको छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्