भाइरल तस्वीरको वास्तविकता : ओलीलाई हटाएर प्रचण्डको फोटो राखिएकै हो त गाउँपालिकामा ?

प्रतिनिधि सभा विघटनपछि सत्तारुढ नेपाल कम्युनिस्ट पार्टी (नेकपा) दुई चिरामा विभाजित हुँदा त्यसको असर स्थानीय सरकारसम्म नै पुगेको छ । 

स्थानीय तहका जनप्रतिनिधिहरूले पनि आफ्नो कित्ता प्रस्ट पारिरहेका छन् ।


Advertisement

यसक्रममा सिन्धुलीको सुनकोशी गाउँपालिकाको एउटा तस्वीर सामाजिक सञ्जालमा भाइरल बनेको छ ।

तस्वीरमा गाउँपालिका उपाध्यक्ष दीर्घसिंह मोक्तानको कार्यकक्षमा राष्ट्रपतिसँगै नेकपा प्रचण्ड–नेपाल समूहका अध्यक्ष पुष्पकमल दाहाल 'प्रचण्ड'को तस्वीर झुण्ड्याइएको छ ।


Advertisement

यहाँ प्रधानमन्त्री केपी शर्मा ओलीको तस्वीर भने राखिएको छैन । 

प्रधानमन्त्री केपी शर्मा ओलीले संसद् विघटन गरेपछि पार्टी विभाजन भैसकेको छ । कानूनी मान्यता पाउन मात्र बाँकी छ ।

यसैको असर गाउँपालिकामा देखिएको हो । 

सुनकोशी गाउँपालिकामा अध्यक्ष दीपा बोहरा दाहाल छिन् । विगत हेर्ने हो भने उनी पूर्व माओवादी खेमाकी हुन् । उनी पूर्व जनमुक्ति सेना नै हुन् ।

लोकान्तरसँग अध्यक्ष दाहालले आफू पूर्व जनमुक्ति सेना भएकाले प्रचण्डको तस्वीर कार्यकक्षमा टाँस्दा अनौठो मान्न नहुने तर्क गरिन् । 

उनले भनिन्, ‘केपी ओलीका साइबर सेनाले तस्वीर भाइरल बनाए । म पनि पूर्व जनमुक्ति सेना हुँ, मैले प्रचण्डको फोटो नराख्ने भन्ने कुरै हुँदैन ।’

उनले प्रधानमन्त्री ओलीले संविधानविपरीत संसद् विघटन गरेपछि आफूले प्रचण्डलाई मात्र आदरणीय मान्न थालेको सुनाइन् ।

यद्यपि प्रधानमन्त्री ओलीको तस्वीर नराखिनुको कारण भने अर्कै रहेको उनको दाबी छ । अध्यक्ष दाहालका अनुसार केही दिनअघि ओलीको तस्वीर भुइँमा झरेर फुटेको छ । 

उनले भनिन्, ‘ओलीको तस्वीर भुइँमा झरेर फुटेपछि बनाउनका लागि सदरमुकाम सिन्धुली पठाइएको छ, अहिलेसम्म आइपुगेको छैन ।’

उनले पहिलेदेखि नै आफूले राष्ट्रपति, प्रधानमन्त्री र प्रचण्डको तस्वीर कार्यकक्षमा राख्ने गरेको सुनाइन् ।

उनले भनिन्, ‘मेरा आदरणीय व्यक्तित्वहरूको तस्वीर मैले कार्यकक्षमा राख्नुपर्छ, कसको राख्ने, कसको नराख्ने भन्ने कुरा मेरो अधिकारको कुरा हो ।’

अध्यक्ष दाहालका अनुसार सामाजिक सञ्जालमा भाइरल तस्वीर सोमवारको हो । सोमवार खेलकुद विकास समितिको बैठकका समयमा सो तस्वीर खिचिएको उनले बताइन् ।

उनले साइबर सेनाहरूले अन्धाधुन्ध विरोध गरेकाले तस्वीर भाइरल भएको बताइन् । उनले भनिन्, ‘मैले राष्ट्रपति, प्रधानमन्त्री र प्रचण्डको तस्वीर सँगै राख्ने गरेको छु । नियतवश हटाइएको होइन ।’

राजनैतिक संकटका बेलामा साइबर सेनाले आफूविरुद्ध प्रचार गरेको उनको आरोप छ ।

 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्