म्यानचेस्टर सिटीको अविश्वसनीय लय– के हो प्रशिक्षक ग्वार्डिओलाको सफल ट्याक्टिसको राज ?

फाइल फोटो

इंग्लिश क्लब म्यानचेस्टर सिटीले पछिल्लो २ महिनायता अविश्वसनीय प्रदर्शन गरिरहेको छ ।

सबै प्रतियोगितामा गरी सिटीले १८ लगातार जीत हात पारेको छ । गएराति आर्सनलविरुद्धको १–० को नतिजा सिटीको लगातार अठारौं जीत हो ।


Advertisement

यसबीचमा सिटीले कठीन मानिएका प्रतिद्वन्द्वीहरू लिभरपूल, म्यान्चेस्टर युनाइटेड, चेल्सी, आर्सनल, टोटनह्याम लगायतलाई पराजित गरिसकेको छ ।

यो लय र सफलता पछाडिका मास्टर माइन्ड हुन्, प्रशिक्षक पेप ग्वार्डिओला ।


Advertisement

सिटीका प्रशिक्षक ग्वार्डिओला फूटबल जगतका महानतम प्रशिक्षकमध्ये एक हुन् । 

सिटीलाई दुईपटक लीग जिताएका ग्वार्डिओलाले यसपटक पनि क्लबलाई उपाधि दिलाउने बाटोमा लगेका छन् । यस सीजनमा १३ वटा खेल बाँकी रहँदा सिटी आफ्नो निकटतम प्रतिद्वन्द्वी म्यानचेस्टर युनाइटेडभन्दा १० अंकको अग्रताका साथ पहिलो स्थानमा छ । 

ग्वार्डिओलाले यसअघि प्रशिक्षण गरेका फूटबल टोलीहरू बार्सिलोना र बायर्न म्युनिखले पनि सफलताका नयाँ अध्याय रचेका थिए । 

प्रशिक्षक हुनुअघि ग्वार्डिओला खेलाडी थिए र १५ वर्ष उनले मिडफील्डरका रूपमा बार्सिलोनाबाट खेलेका थिए । तर बारम्बार घाइते हुने भएकाले उनले धेरै खेल्न पाएनन् । 

बार्सिलोनामा छँदा महानतम खेलाडी तथा प्रशिक्षक योहान क्रुफबाट फूटबलको शैली सिकेका थिए । क्रुफले सही तरिकाले फूटबल खेल्न बार्सिलोनालाई सिकाएका थिए । सही तरिका भन्नाले बल लगातार पास गरिरहने हो । 

मिडफील्डरका रूपमा ग्वार्डिओलाले बल नियन्त्रणको महत्त्व बुझ्ने मौका पाए । उनको मूल मन्त्र नै ‘बल लिऊ, बल पास गर’ हो । 

ग्वार्डिओला सन् २००१ मा बार्सिलोना छोडे र खेलबाट सन् २००६ मा संन्यास लिए । 

सन् २००७ मा उनी प्रशिक्षणमा फर्किए अनि फूटबलको आफ्नै अद्वितीय दर्शन लागू गर्नका लागि कोशिश गरे । 

उनलाई बार्सिलोनाको बी टीमलाई प्रशिक्षण गर्ने जिम्मेवारी दिइयो र एक सीजनमै उनले क्लबमा सबैलाई प्रभावित पारे र ए टीमको प्रशिक्षणको जिम्मेवारी उनलाई दिइयो । 

चार वर्ष बार्सिलोनाको प्रशिक्षक रहँदा ग्वार्डिओलाले तीनपटक ला लिगा र दुईपटक च्याम्पियन्स लीग जिताए । 

पछि उनी जर्मनीको बायर्न म्युनिख क्लबलाई प्रशिक्षण दिन गए । त्यहाँ रहँदा पनि आफ्नो स्टाइललाई नसुहाउने खेलाडी बेचे । उनको शैलीलाई पछ्याउन सक्ने खेलाडीलाई साथ लिएर उनले लगालग तीन सीजन बायर्नलाई च्याम्पियन बनाए । 

दुर्भाग्यको कुरा, बायर्नले च्याम्पियन्स लीगमा चाहिँ अपेक्षित सफलता पाएन । ग्वार्डिओलाको प्रशिक्षणमा बायर्न प्रत्येक सीजनमा सेमीफाइनलबाटै बाहिरियो । 

बायर्नबाट उनी म्यानचेस्टर सिटी गए र पहिलो सीजनमा टीम तेस्रो स्थानमा मात्र रह्यो । 

तर दोस्रो सीजनमा अर्थात् २०१७–१८ मा म्यानचेस्टर सिटीले १०० अंकका साथ उपाधि जित्यो जुन प्रेमियर लीगकै इतिहासको कीर्तिमान हो । च्याम्पियन्स लीगमा चाहिँ ग्वार्डिओलाको दुर्भाग्य जारी रह्यो र सिटी फाइनलसम्म पुग्नै सकेन । 

ग्वार्डिओलाले आफ्ना खेलाडीहरूलाई एकएक विपक्षी खेलाडीलाई मार्क गर्न र विपक्षीलाई पास दिनका लागि स्पेस नदिन लगाउँछन् । विपक्षीले लंग बल मात्र खेलून् भन्ने उनको रणनीति रहन्छ । 

उनका खेलाडीले विपक्षीलाई नियन्त्रण गुमाउने गरी लंग शट हान्न बाध्य बनाउँछन् अनि विपक्षीबाट बल खोस्छन् र छोटा छोटा पास खेल्छन् । त्यसपछि विपक्षीको गोलपोस्ट नजिक बल पुर्‍याउने र गोल गर्ने अवसर जुटाउने काम उनीहरूले गर्छन् । 

त्यसबाहेक म्यानचेस्टर सिटीमा ग्वार्डिओलाले टीमलाई कुनै एक खेलाडीका निर्भर बनाएका छैनन् । प्रत्येक खेलाडीको आफ्नो भूमिकामा पर्फेक्ट छन् र कसैमाथि सुपरस्टारडमको दबाब छैन । 

अनि उनी खेलाडीहरू रोटेट गरिरहन्छन् र फल्स नाइन जस्ता चतुर रणनीति अपनाइरहन्छन् । यसले गर्दा पनि सिटीले सफलता पाइरहेको छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्