दुईतीन दिनभित्र प्रतिनिधि सभा विघटनसम्बन्धी फैसला : ओली

प्रधानमन्त्री केपी शर्मा ओलीले दुईतीन दिनभित्र प्रतिनिधि सभा विघटनसम्बन्धी फैसला हुने बताएका छन् । उनले प्रतिनिधिसभा पुनःस्थापना भए फेरि सांसद किनबेच र तमासाको राजनीति शुरू हुने पनि बताए । 

कञ्चनपुरको वेदकोट नगरपालिकामा सोमवार औद्योगिक क्षेत्र व्यवस्थापन लिमिटेडको आयोजनामा छेला औद्योगिक क्षेत्र शिलान्यास गर्दै प्रधानमन्त्री ओलीले प्रतिनिधिसभा पुनःस्थापना भए देश निर्माणको काम प्रभावित हुने पनि बताए ।


Advertisement

‘अब यदि पुनःस्थापना हुने हो भने के हुन्छ, यसो कल्पना गरौं । पुनःस्थापना हुने भयो भने प्रधानमन्त्री खोज्न हिँड्नुपर्छ, प्रधानमन्त्री खोज्न पार्टी खोज्न हिँड्नुपर्छ । कुनै पार्टीको बहुमतको सरकार हुँदैन, त्यसो भएपछि समीकरणका अनेक खेल, सांसद किनबेच कसलाई कुन पद, भागबण्डा त्यही तमासाको राजनीति फेरि शुरू हुन्छ,’ ओलीले भने । 
प्रधानमन्त्री ओलीले आफूले विराटनगरमा भनेको कुरालाई गलत ढंगले व्याख्या गरिएको दाबी समेत गरे । 

‘अहिले संसद् विघटन भएको छ, अब देश निर्वाचनतर्फ जाँदैछ । हुनसक्छ, दुईतीन दिनभित्र प्रतिनिधि सभा विघटनसम्बन्धी फैसला हुन्छ । अस्ति मैले विराटनगरमा बोल्दा भनेको थिएँ, केही मान्छेहरू यसो भयो भने त आफ्नो राजनीति नै सिद्धिन्छ भनेर छटपट छटपट गरेका छन् । हामी देश बनाउने अभियानमा छौं, जसो भएपनि हाम्रो राजनीति सिद्धिँदैन । केही भएपनि सिद्धिँदैन । देश बनाउने, लोकतन्त्रलाई बलियो बनाउने हाम्रो आन्दोलन अघि बढिरहन्छ,’ ओलीले भने, ‘आन्दोलन भनेको उनीहरूले नारा जुलुस, भत्काउने, ढुंगा हान्ने के–के बुझेछन कुन्नि ? मैले त देश बनाउने आन्दोलन, लोकतन्त्रलाई सुदृढ गर्ने आन्दोलन भनेको थिएँ ।’


Advertisement

प्रधानमन्त्री ओलीले अदालतलाई धम्की दिने बानी नभएको र स्वतन्त्र न्यायालय तथा शक्ति पृथकीकरणको सिद्धान्तलाई सरकारले सम्मान गर्ने बताए ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्