राजीनामा नदिएर हठ गरिरहे ओलीका लागि वियोगान्त हुनेछ– योगेश भट्टराई

फाइल फोटो

नेकपा (प्रचण्ड–नेपाल) समूहका स्थायी कमिटी सदस्य योगेश भट्टराईले केपी शर्मा ओलीले प्रधानमन्त्री पदबाट राजीनामा नदिएर टसल गर्न आए उनका लागि वियोगान्त हुने बताएका छन् ।

राजीनामा नदिए प्रतिनिधि सभाले विकल्प खोज्ने उनको भनाइ छ ।


Advertisement

प्रेस संगठन प्रदेश २ को भेलालाई आइतवार जनकपुरमा सम्बोधन गर्दै भट्टराईले अब बस्ने प्रतिनिधि सभाले ओलीमाथि कारवाही गर्ने दाबी गरे ।

‘तीन करोड नेपालीको भाग्य र भविष्यमाथि खेलबाड गर्ने प्रधानमन्त्रीलाई कारवाही नगरेर प्रतिनिधि सभाले आफ्नो मृत्यु पत्रमा सही गर्ने छैन । आफ्नो मलामी आफैँ जाने घातक निर्णय गर्ने छैन,’ भट्टराईले भने ।


Advertisement

सर्वोच्च अदालतले फैसला गरिसक्दा पनि प्रधानमन्त्री पदमा बसिराख्नु अनैतिक भएको उनले दाबी गरे । ‘नैतिकरूपमा पद त्याग गर्नु आजका लागि उत्तम विकल्प हो । राजीनामा नगरे प्रतिनिधि सभाले त्यसपछि विकल्प खोज्छ, हठ लिनुभयो र दम्भ प्रकट गर्नुभयो भने उहाँका लागि वियोगान्त हुनेछ । प्रधानमन्त्रीलाई त्यो ठाउँमा नपुग्न आग्रह गर्छु,’ भट्टराईले भने । 

नेता भट्टराईले ओलीले लचकता देखाएमा नेकपा एकताको झिनो सम्भावना बाँकी नै रहेको दाबी गरे । 

‘एक ठाउँ बाँकी छ, ओलीले लचकता देखाउनुभयो भने विभाजित नेकपा एक गर्न सक्ने झिनो आशा र सम्भावना बाँकी छ । एकताका लागि हामी प्रयत्नशील छौं । दुई/तीन महिनाको घटनाबाट शिक्षा लिऔं । त्यसका लागि सबभन्दा बढी भूमिका खेल्नु पर्नेछ, आजका प्रधानमन्त्रीले मार्ग प्रशस्त गरेर,’ उनले भने । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्