लोकान्तर यात्रा

लोकान्तर छैटौं वर्षमा : महासंकटको कष्टपूर्ण यात्रामा पनि विचलित हुनेछैनौं

लोकान्तर छैटौं वर्षमा : महासंकटको कष्टपूर्ण यात्रामा पनि विचलित हुनेछैनौं

लोकान्तर सञ्चार प्रालिद्वारा सञ्चालित लोकान्तर डट्कम (Lokantar.com) आजदेखि छैटौं वर्षमा प्रवेश गरेको छ । पाँच वर्ष त्यति लामो त होइन, तर पाठकहरूबाट निरन्तर माया नपाएको भए शायद हाम्रो यात्रा कतै अलमलिन पनि सक्थ्यो । तसर्थ, छैटौं वर्ष प्रवेशको यो अवसरमा सबैभन्दा पहिला हामी तपाईं आमपाठक, विज्ञापनदाता, शुभचिन्तक, लेखक, स्तम्भकारप्रति हृदयदेखि आभार व्यक्त गर्न चाहन्छौं ।


Advertisement

हामी दैनिक सयौंको संख्यामा सामाग्री पस्कछौं । ती पढ्न तपाईंहरूले लोकान्तर डट्कम ‘भिजिट’ गर्नुहुन्छ । हामीले गरेका गल्ती औंल्याइदिनुहुन्छ । अझै विश्वसनीय र सन्तुलित सामग्रीका लागि रचनात्मक सुझाव दिनुहुन्छ, घच्घच्याइरहनुहुन्छ । तपाईंका ती सुझाव र निरन्तरका खबरदारी नै हाम्रो प्रेरणाका स्रोत हुन्, रहिरहनेछन् ।


Advertisement

सिंगो विश्व करीब डेढ वर्षदेखि कोरोना भाइरसको महामारीबाट आक्रान्त छ, नेपाल अछुतो छैन । गत वर्ष हामी पाचौं वर्षमा प्रवेश गर्दैगर्दा विभिन्न देशलाई जस्तै नेपाललाई पनि कोरोना भाइरसले सताइसकेको थियो ।

यसपटक यो सम्पादकीय सम्प्रेषण गर्दैगर्दा अन्य मुलुकझैं नेपाल पनि यो महामारीबाट थप प्रताडित बनेको छ । हामी यो क्षणमा कोरोना भाइरसका कारण ज्यान गुमाउनुभएका विश्वभरका लाखौं जनप्रति गहिरो समवेदना व्यक्त गर्दै यसबाट संक्रमितहरूको शीघ्र स्वास्थ्यलाभको कामना गर्छौं । विश्व मानवजातिलाई कोरोनाभाइरस विरुद्धको लडाईंमा छिट्टै सफलता मिलोस्, हाम्रो कामना छ ।


Advertisement

कोरोना नियन्त्रणका लागि संसारका धेरै देशले लकडाउन लागू गरे । त्यसले अर्थतन्त्रमा ठूलो असर गर्‍यो । नेपालको सानो अर्थबजार पनि नराम्ररी प्रभावित बन्यो, बनिरहेको छ । यतिबेला हामी ती विज्ञापनदाताप्रति विशेष आभार व्यक्त गर्न चाहन्छौं, जसले कोरोनाकालमा घाटा-नाफा बिर्सेर हामीलाई निरन्तर सहयोग गर्नुभयो । तपाईंहरूको सहयोगविना मिडियाको अस्तित्व गम्भीर संकटमा पर्नेमा दुई मत छैन । सम्पूर्ण विज्ञानपनदाता, व्यापारिक घराना र तिनका नेतृत्व एवं सरोकारवाला सबैलाई हामी हृदयदेखि सलाम अर्पण गर्न चाहन्छौं ।

आरदणीय पाठकवृन्द, 

हामीले गएको वर्ष हाम्रो ‘ट्याग लाइन’ (नारा) परिवर्तन गर्‍यौं । ‘निरन्तर तथ्यको खोज’ भन्ने नारालाई परिवर्तन गरेर ‘सनसनी होइन...समाचार’ भन्ने नयाँ नारा प्रयोग गर्न थालेका छौं । सनसनीका लागि समाचार बनिरहेको र समग्र मिडिया जगतमाथि नै विश्वासको प्रश्न उठिरहेको समयमा सनसनी होइन समाचार पस्कन्छौं भन्ने नै हाम्रो प्रतिज्ञा हो ।

नारा आफ्नो ठाउँमा छ । खोज र सत्यतथ्यमा आधारित सन्तुलित एवं विश्वसनीय सामग्री सम्प्रेषणमा आफूलाई खरो उतार्ने हाम्रो प्रयास सदैव अविचलित रहनेछ । महासंकटको यो कठिन घडीमा हामी अझै जिम्मेवारीका साथ उपस्थित हुनेछौं । 

राष्ट्रिय पत्रकारिता दिवसको अवसर पारेर २०७३ वैशाख २४ गते लोकान्तर डट्कम पाठकसामु ल्याउँदा पत्रकारिताका मूल्य मान्यता र खोजमूलक पत्रकारिताबारे हामीले जुन संकल्प गरेका थियौं, त्यसमा अन्तिम क्षणसम्म इमान्दार भएर लाग्ने संकल्प यस अवसरमा पुनः दोहोर्‍यााउन चाहन्छौं । 

यो अवधिमा लोकान्तर डट्कमले खोजमूलक समाचार पोर्टलको पृथक पहिचान बनाएको छ, हामी त्यसमा अझै निखार ल्याउने प्रयत्न गर्नेछौं ।

विश्वले कल्पनासम्म नगरेको अहिलेको महासंकटको समयमा डिजिटल पत्रिका (अनलाइन पत्रकारिता) को भूमिका अझै प्रभावकारी बनेको महसूस हामीले गरेका छौं । तर, कोरोना भाइरसका कारण थिलोथिलो हुन पुगेको अर्थतन्त्रको प्रत्यक्ष असर पत्रकारितामा परेको हुनाले हाम्रो आगामी यात्रा पक्कै सहज हुनेछैन । संकटमा पनि सही, स्थलगत, खोज र विश्लेषणात्मक सामग्रीको सम्प्रेषणमा निरन्तर जुटिरहने छौं ।

अन्तिममा, प्रिय पाठकलाई हाम्रो अनुरोध छ– कोरोना विरुद्धको लडाईंमा आ–आफ्नो स्थानबाट सक्दो योगदान गरौं । मानिसको वास्तविक परीक्षा संकटको घडीमा हुने गर्छ । संसारका करीब ७ अर्ब मानिस संकटमा छन् । यो धैर्य गर्ने र एक अर्कालाई सहयोग गर्ने समय हो । अप्ठ्यारोमा परेकालाई खुला हृदयले सहयोग गरौं । पहिला यो रोगलाई परास्त गरौं । बाँचे अरू त पछि गर्न सकिहालिन्छ । यतिबेला तपाईं घरमै बस्नु पनि कोरोनाविरुद्धको लडाईंमा सघाएको ठहरिनेछ ।

घरमा बस्दा समय कसरी कटाउने भन्ने कुराले चिन्तित हुनुहुन्छ भने लोकान्तर डट्कम तपाईंको साथमा छ । तपाईंलाई पलपलमा विश्वसनीय सूचना दिन हामी चौबीसै घण्टा जागा छौं । 

हामी दोहोर्‍याएर कामना गर्छौं– अर्को वर्ष वैशाख २४ गते हामीले लोकान्तर डट्कमको छैटौं वर्षगाँठलाई स्मरण गर्नुअगावै सिंगो विश्व नै तहसनहस पारिरहेको यो कोरोनाभाइरस रूपी महामारी सम्पूर्ण रूपले हराएर जाओस् र मानवीय जीवन सामान्य अवस्थामा फर्कन सकोस् ।

लोकान्तर सम्पादकीय
लोकान्तर सम्पादकीय

लेखकबाट थप...

कमेन्ट गर्नुहोस्