वैद्यको भनाइ अक्षम्य र आपराधिक, बर्खास्त गरेर कडा कारवाही गर

बाग्मती प्रदेशसभा बैठकमा प्रधानमन्त्री केपी शर्मा ओलीविरुद्ध आफू ‘नाथुराम गोड्से’ बन्न तयार रहेको भन्दै नेपाली कांग्रेसका सांसद नरोत्तम वैद्यले अत्यन्त आपत्तिजक र असभ्य अभिव्यक्ति दिएका छन् ।


Advertisement

वैद्यको त्यो आपत्तिजक अभिव्यक्तिलाई लिएर अहिले सिंगो सचेत समाज विरोधमा उत्रिएको छ, जुन स्वाभाविक छ । नेपालको संसदमा नाथुराम गोड्सेको नाम उच्चारण हुनु अत्यन्त खेदजनक छ ।


Advertisement

नाथुराम गोड्से महात्मा गान्धी जस्तो अहिंसात्मक राजनीतिमा विश्वास राख्ने स्वतन्त्रता आन्दोलनका महापुरुषको हत्यामा संलग्न बदनाम पात्रको नाम हो । गोड्सेले सन् १९४८ मा गान्धीको क्रूरतापूर्वक हत्या गरेको थियो । त्यस्ता व्यक्तिको नाम प्रदेश सभामा उच्चारण गरेर कांग्रेसका सांसदले आफ्नो व्यक्तिगत साख त सखापै पारे साथै नेपालमा लोकतन्त्र स्थापनाका लागि लडेको पार्टीको छवि समेत धुमिल्याइदिएका छन् ।

वैद्यको यो अभिव्यक्ति यति आपत्तिजनक छ, जसले उनी स्वयं र उनी संलग्न पार्टीको छविमा गम्भीर दाग लगाएको छ । त्यस्तो दाग सहजै मेटिन गाह्रो पर्छ ।


Advertisement

प्रदेश सरकारको नीति तथा कार्यक्रम माथिको छलफलका क्रममा शुक्रवार सांसद वैद्यले ‘... कोही नाथुराम गोड्से आवश्यक पर्‍यो है यो देश बचाउनको लागि । ... कोही नाथुराम गोड्से बन्न तयार छैन भने म नै बन्ने कि’ भनेर हिंसालाई प्रोत्साहन गर्ने अभिव्यक्ति दिएका थिए ।

सांसद वैद्यको आपत्तिजनक अभिव्यक्ति फिर्ता गर्न बागमती प्रदेश सभामा कांग्रेस संसदीय दलका नेताले निर्देशन दिए पनि उनले अहिलेसम्म माफी मागेका छैनन् । 

लोकतन्त्रमा अभिव्यक्ति स्वतन्त्रताका सीमा हुन्छन् । आफ्नो मर्यादा भुलेर संसदभित्र प्रकट हुने यस्ता अमर्यादित, हिंसात्मक र आपत्तिजनक अभिव्यक्ति राजनीतिक र अभिव्यक्ति स्वतन्त्रताभित्र पर्दैनन् । यो सरासर आपराधिक अभिव्यक्ति हो र यसमा अल्मलिरहने गुञ्जायस नै छैन । यस्ता अभिव्यक्तिले लोकतन्त्रलाई बलियो बनाउने होइन, अराजकता निम्ताउन मद्दत गर्छ । 

सांसद वैद्यले हिजो प्रदेश सभामा बोलेका आपत्तिजनक अभिव्यक्ति फिर्ता लिएर सार्वजनिक रूपमा माफी माग्नुपर्छ । त्यतिले पुग्दैन, हिंसात्मक अभिव्यक्ति दिएको र देशको प्रधानमन्त्रीविरुद्ध ‘नाथुराम गोड्से’ बन्न तयार रहेको अर्थात् हत्याका लागि पछि नपर्ने भन्ने खालको अभिव्यक्ति दिएकोमा उनले सांसद पदबाट राजीनामा गर्नुपर्छ । राजीनामा नगरे कांग्रेसले उनलाई सांसद पदबाट हटाउनुपर्छ, बर्खास्त गर्नुपर्छ ।

सामान्य विवादास्पद अभिव्यक्तिका कारण नेपालमा मन्त्रीहरूले राजीनामा गरेका उदाहरण छन् । त्यसैले किन्तु परन्तु नभनी कांग्रेसले वैद्यलाई राजीनामा गराउनुपर्छ । प्रदेशसभा सचिवालयले उनको त्यो रेकर्ड सभाको अभिलेखबाट हटाउनुपर्छ । 

यदि यो तहको कारवाही भयो भने मात्र भोलिका दिनमा सांसदको भेषमा अरु वैद्यहरू जन्मने छैनन् । होइन भने यस्ता वैद्यहरू सल्वलाइरहने छन् । 

सांसद संविधान र कानूनभन्दा माथि हुँदैनन् । उनीहरूले बोल्दा, निर्णय लिँदा र व्यवहार गर्दा अनुशासन, विधि, प्रक्रिया र प्रचलित ऐन कानूनको सीमा नाघ्नु हुँदैन या नाघ्न पाउँदैनन् भन्ने नजिर स्थापनाका लागि पनि वैद्यमाथि हदैसम्मको कारवाही आवश्यक छ भन्ने लोकान्तर डट्कमको सम्पादकीय निचोड छ । 

राजनीतिक दलले आफ्ना सांसदलाई छाडा बोल्ने कुरामा लगाम नलगाए हाम्रा संसदहरू प्रतिशोधी र यस्तै हिंसात्मक आवाज गुञ्जने कर्कस सभामा रूपान्तरण हुनेछन् । नेपाललाई कोही ‘नाथुराम गोड्से’ चाहिएको छैन । यस्ता आपत्तिजनक, आपराधिक र हिंसात्मक अभिव्यक्ति नेपाली सभ्य समाजमा कुनै पनि बहानामा स्वीकार्य छैनन् ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्