नेकपा एमाले लुम्बिनी प्रदेश सभाका प्रमुख सचेतक भूमिश्वर ढकालले सांसद विमला वलीले आफूमाथि अपहरणको शैलीमा बुटवल ल्याएको भनेर झूटो कुरा गरेको दाबी गरेका छन् ।

मुख्यमन्त्री शंकर पोखरेललाई भेट्न जान्छु भनेपछि वलीलाई आफ्नै गाडीमा राखेर बुटवल ल्याइएको उनले बताए । 

बिमला वलीले बिहीबार बुटवलमा पत्रकार सम्मेलन गरी आफूलाई भूमिश्वर ढकाल र दाङका एमाले नेता मानबहादुर राउतले बुटवल नजाने भन्दाभन्दै जबरजस्ती अपहरणको शैलीमा मुख्यमन्त्री निवासमा पुर्‍याएको बताइकी थिइन् ।

‘पार्टी अध्यक्ष केपी शर्मा ओलीले उहाँलाई कारवाही गर्न स्पष्टीकरणको पत्र काटेपछि म त्यो पत्र लिएर उहाँलाई बुझाउन दाङ गएको हुँ । पत्र हेरेपछि उहाँ (विमला)ले हुन्छ, एकपटक मुख्यमन्त्रीलाई भेट्छु । कुरा गर्छु भन्नुभयो,’ ढकालले लोकान्तरसँग भने, ‘त्यसपछि सहमतिमै उहाँ मेरो गाडीमै बसेर बुटवल आउनुभएको हो । हामी  दुई वटा गाडीमा आएका हौं । उहाँ मेरो गाडीमा बस्नुभएको हो । उहाँको दिदी र भिनाजुको भाइ पनि सँगै बुटवल आउनुभएको हो । उहाँले लगाएको आरोप वाइयात हो ।’

ढकालले थपे, ‘हामीले इमिलिया आएर सँगै खाना खायौं । राजीखुशी उहाँ बुटवल आएर मुख्यमन्त्री कार्यालयमा जानुभएको हो । उहाँलाई अपहरण गरेको भए त मोबाइल कसरी हुन्थ्यो ? सिम कार्ड खोसिन्थ्यो होला । यो अपहरण होइन । उहाँले अनावश्यक राजनीतिक इस्यू बनाउनुभयो ।’