झण्डै १ अर्बमा बनेको महान्यायाधिवक्ता कार्यालय भवन चुहियो, पार्किङमा जम्यो ताल [भिडियोसहित]

कर्मचारी भन्छन्- 'लिफ्ट समेत ३ महिनादेखि बिग्रिएर थन्कियो'

अजय अनुरागी
अजय अनुरागी

अजय अनुरागी लोकान्तरका लागि खोज, राजनीति र समसामयिक विषयवस्तुमा कलम चलाउँछन् ।

झण्डै एक अर्ब खर्चिएर हालै निर्माण सम्पन्न भएको महान्यायाधिवक्ताको कार्यालय भवनमा पानी चुहिँदा पार्किङ क्षेत्रमा ताल जमेको छ ।


Advertisement

शर्मा–समानान्तर जेभीले करीब ९५ करोडमा निर्माण सम्पन्न गरी तत्कालीन प्रधानमन्त्री केपी शर्मा ओलीले पुस ८ गते उद्घाटन गरेको अत्याधुनिक भवनमा एक वर्ष नबित्दै पानी चुहिएको हो ।


Advertisement

'बाहिरबाट छिरेको होइन, भवन नै चुहिएर पानी जमेको हो,' महान्यायाधिवक्ताको कार्यालयका एक कर्मचारीले लोकान्तरसँग भने, 'झण्डै एक अर्ब खर्चिएको भवन एक वर्ष नपुग्दै चुहिन थालेको छ ।'

२०७४ असोज २४ गते तत्कालीन महान्यायाधिवक्ता अग्नि खरेलले शिलान्यास गरेको भवन ३ वर्ष ३ महिनापछि उद्घाटन गरिएको थियो । 


Advertisement

यता महान्यायाधिवक्ताको कार्यालयका प्रवक्ता सञ्जीवराज रेग्मीले भने पार्किङ क्षेत्रबाट बाहिर ढलमा पानी जान नसक्दा समस्या भएको बताए ।

'हाम्रो पार्किङ क्षेत्रभन्दा बाहिर ढलको हाइट नै बढी भएकाले यो समस्या आएको हो,' रेग्मीले भने, 'पछि बाहिर ढल खनेर त्यसलाई मिलायो भने सधैंका लागि समस्या समाधान हुनसक्छ।'

अहिले अस्थायी समाधानका लागि ठेकेदार कम्पनीले नै मोटर लगाएर पानी बाहिर तानिरहेको रेग्मीले जानकारी दिए । उक्त समस्याको स्थायी समाधान पनि ठेकेदारले नै गर्ने उनको भनाइ छ ।

यति मात्र होइन, त्यहाँका एक कर्मचारीका अनुसार लिफ्ट समेत ३ महिनादेखि बिग्रिएको छ । सञ्चालनमा आउन नपाउँदै लिफ्ट बिग्रिएर थन्किएको हो ।

ठूलो रकम खर्चिएर बनाएको अत्याधुनिक भनिएको भवनको समेत यस्तो बेहाल देख्दा कर्मचारीहरू नै दिक्क छन् ।

हेर्नुहोस्, भिडियो :

अजय अनुरागी
अजय अनुरागी

लेखकबाट थप...

कमेन्ट गर्नुहोस्