लुम्बिनीमा एमाले विभाजनको असर : दाङमा पहिरो, गुल्मीमा नेकपा (एस) शून्य !

प्रकाश आचार्य
प्रकाश आचार्य

लोकान्तर संवाददाता आचार्य लुम्बिनी प्रदेशबाट रिपोर्टिङ गर्छन् ।

लुम्बिनी प्रदेशमा नेकपा एमाले विभाजनको असर अन्य जिल्लाको तुलनामा दाङमा बढी देखिएको छ । दाङमा एमालेबाट जितेका दुुई संघीय सांसदले अहिले नेकपा एकीकृत समाजवादी रोजेका छन् । क्षेत्र नम्बर १ बाट निर्वाचित मेटमणि चौधरी र क्षेत्र नम्बर ३ बाट निर्वाचित हिराचन्द्र केसीले नयाँ पार्टी रोजेका हुन् । दाङ लुम्बिनी प्रदेशमा निर्वतमान मुख्यमन्त्री एवं नेकपा एमालेका प्रभावशाली नेता शंकर पोखरेलको गृहजिल्ला हो । 


Advertisement

क्षेत्र नम्बर २ बाट माओवादी केन्द्रका कृष्णबहादुर महरा विजयी भएका थिए । प्रदेश सभाका ६ क्षेत्रमध्ये ४ क्षेत्र एमालेले जितेको थियो । दुुई क्षेत्रमा माओवादी र कांग्रेसले जितेका थिए । दाङबाट प्रत्यक्ष निर्वाचित दुुई जना प्रदेश सांसदले एमाले त्यागे । क्षेत्र नम्बर २ (क) बाट निर्वाचित सांसद अमरबहादुर डाँगी र क्षेत्र नम्बर ३ (ख) बाट उपचुनाव जितेकी विमला वली नेकपा माओवादी केन्द्रमा छन् ।  एमालेबाट निर्वाचित सांसद उत्तरकुमार वलीको सडक दुर्घटनामा मृत्यु भएपछि उनकै श्रीमती विमलाले तत्कालीन नेकपाबाट निर्वाचन जितेकी थिइन् ।  


Advertisement

डाँगी एमाले परित्याग गरी सांसद पदबाट राजीनामा दिएपछि अहिले मुख्यमन्त्री कूलप्रसाद केसीको प्रमुख राजनीतिक सल्लाहकार रहेका छन् भने उपचुनाव जितेकी वली माओवादीबाट प्रदेशको मन्त्री बन्ने तयारीमा छन् । दाङबाट प्रदेश सभामा प्रत्यक्ष निर्वाचित रेवतीरमण शर्मा घिमिरेले पोखरेललाई साथ दिएका छन् । 

तर, स्थानीय तहमा भने असर अलि कम देखिएको छ । गढवा गाउँपालिकाकी उपाध्यक्ष शान्ति चौधरीले एकीकृत समाजवादी रोजेकी छन् । शान्ति एकीकृत समाजवादीका नेता मेटमणि चौधरीकी दिदी हुन् । दाङका १० स्थानीय तहमध्ये ६ वटामा एमाले विजयी भएका थिए । दाङको स्थानीय तहमा २१ जनाले नेकपा एकीकृत समाजवादी पार्टी रोजेका छन् । तीमध्ये धेरै वडा सदस्य छन् ।  


Advertisement

स्थानीय तहमा माधव निकट मानिएका जनप्रतिनिधिले भने पार्टी विभाजनपछि नयाँ पार्टीतर्फ रूचि नदेखाएको दाङका एक एमाले नेताले बताए । 

ती नेताले भने, ‘प्रभावशाली नेता शंकर पोखरेलले समन्वयकारी भूमिका निभाउन नसक्दा हामीले प्रदेशका पनि दुुई सांसद गुमाउनुपर्‍यो । विचारमा प्रभावशाली देखिए पनि जिल्लाको राजनीतिमा उहाँको भूमिका प्रभावकारी देखिएन । जसले गर्दा लुम्बिनी प्रदेशमा अन्य जिल्लाबाट भन्दा दाङमा एमालेबाट निर्वाचित सांसद केही माओवादीतिर लागे कोही नयाँ पार्टीमा ।’

गुल्मीमा नेकपा एकीकृत समाजवादी पार्टी जनप्रतिनिधिका हिसाबले निल बनेको छ । निर्वाचन आयोगले दल रोज्न दिएको समयको अन्तिम दिन भदौ २२ गते कार्यलय समयभर कुनै पनि जनप्रतिनिधिले नेकपा समाजवादी दल रोजेनन् । गुल्मी एमालेका प्रभावशाली नेता प्रदीप ज्ञवाली र गोकर्ण विष्टको गृहजिल्ला हो । 

नेकपा समाजवादीकी नेतृ रामकुमारी झाँक्रीको गृहजिल्ला पनि हो, गुल्मी । गुल्मीका २ नगरपालिका र १० गाउँपालिकासहित १२ वटा पालिकामध्ये सातवटा पालिका प्रमुखमा एमालेका नेताहरू छन् । १० जना उपप्रमुख छन् । वडाध्यक्ष र  वडा सदस्य ३१३ जनासहित कुल ३ सय ३० जना प्रतिनिधि एमाले छन् । राष्ट्रियस्तरमा रामकुमारी झाँक्रीको प्रभाव र चर्चा चुलिए पनि स्थानीय तहमा भने उनको प्रभाव कमजोर देखिएको छ ।

रुपन्देहीमा नेकपा एमालेका एक जना उपमेयरसहित सात जनाले नेकपा एकीकृत समाजवादी रोजेका छन् । सिद्धार्थनगर नगरपालिकाकी उपप्रमुख उमा काफ्लेसहित तिलोत्तमा, बुटवल र देवदहका ७ जनाले नयाँ दल रोजे । संघीय र प्रदेशतर्फ कुुनै पनि सांसदले नयाँ दल रोजेनन् । 

रुपन्देहीमा १६ स्थानीय तहमध्ये ७ वटामा प्रमुख र ८ वटामा उपप्रमुख पद एमालेले जितेको थियो । एमालेका उपमहासचिवद्वय विष्णु पौडेल र घनश्याम भुसालको गृहजिल्ला हो, रुपन्देही ।

भदौ १५ गतेदेखि २२ गतेसम्म दल रोज्न समय निर्धारण गरेको थियो । त्यस्तै अर्घाखाँची जिल्लामा एमालेबाट निर्वाचित एक गाउँपालिका उपाध्यक्षसहित ६ जना जनप्रतिनिधिले नेकपा एकीकृत समाजवादीमा सनाखत गरेका छन् । पाणिनी गाउँपालिका उपाध्यक्ष लक्ष्मी गौतमसहित चारजनाले नेकपा एकीकृत समाजवादीमा सनाखत गरेको जिल्ला निर्वाचन कार्यालयले जनाएको छ । बाँकी वडा सदस्यहरू रहेको निर्वाचन आयोगले जनाएको छ ।

बाँकेमा एक जना वडाध्यक्षसहित १२ जनाले नेकपा एकीकृत समाजवादी दल रोजेका छन् । एक वडाअध्यक्षसहित ३ कार्यपालिका सदस्य र बाँकी सदस्यहरू रहेको जिल्ला निर्वाचन कार्यालय बाँकेका प्रमुख खुमप्रसाद सुवेदीले बताए ।

कपिलवस्तुमा नेकपा एमाले परित्याग गरी नेकपा एकीकृत समाजवादीमा एक जना मात्रै वडा सदस्य खुलेका छन् । शिवराज नगरपालिका कार्यपालिका एक जना सदस्यले जिल्ला निर्वाचनमा गएर समाजवादीमा सनाखत गरेको निर्वाचन आयोगले जनाएको छ ।

त्यसैगरी प्युठानमा ७, रुकुम पूर्वमा एक उपाध्यक्ष सहित ५, रोल्पामा ५, पाल्पा १ र नवलपरासी १ जनाले मात्रै नेकपा एकीकृत समाजवादी पार्टी रोजेका छन् । 

लुम्बिनीमा नेकपा एकीकृत समाजवादी (स्थानीय तह जनप्रतिनिधि):

दाङ –२१ 

बाँके–११ 

रुपन्देही–७ 

बर्दिया–६ 

रुकुम पूर्व–५ 

रोल्पा–५ 

अर्घाखाँची–६ 

प्युठान–७ 

गुल्मी–० 

पाल्पा–१ 

नवलपरासी (पश्चिम)–१ 

कपिलवस्तु –१ 

प्रकाश आचार्य
प्रकाश आचार्य

लेखकबाट थप...

कमेन्ट गर्नुहोस्