सिवा स्वास्थ्य चौकीको ‘बर्थिङ सेन्टर’ २ वर्षदेखि बन्द

पाँचथरको फिदिम नगरपालिका–६ को सिवा स्वास्थ्य चौकीमा रहेको ‘बर्थिङ सेन्टर’ विगत २ वर्षदेखि बन्द हुँदा सेवाग्राही समस्यामा परेका छन् । 


Advertisement

दरबन्दी अनुसारका स्वास्थ्यकर्मी गाउँमा नबस्ने तथा सेन्टरमा खटिने स्वास्थ्यकर्मीका लागि आवासको व्यवस्था नहुँदा बन्द भएको हो । 


Advertisement

स्वास्थ्य चौकीमा ४ वर्षअघि सेन्टर स्थापना गराइएको थियो । अहिले प्रसूति हुने सबैलाई सदरमुकाम फिदिम पुर्‍याउनुपर्ने बाध्यता रहेको स्थानीयले गुनासो गरेका छन् ।

‘गाउँको बर्थिङ सेन्टर बन्द हुँदा रातारात सदरमुकाम पुग्नुपर्ने, होटलमा खाने बस्ने प्रबन्ध गर्नुपर्दा धेरै खर्च हुने समस्या छ,’ स्थानीय तिलक तुम्रोकले भने, ‘यसले कमजोर आर्थिक अवस्थाका स्थानीयलाई समस्या पारेको छ ।’


Advertisement

बर्थिङ सेन्टर सञ्चालनमा ल्याउन आफूहरूले निरन्तर आवाज गर्दै आएको भए पनि सेवा सञ्चालन हुन नसकेको स्थानीयको गुनासो छ ।

स्थानीयले बर्थिङ सेन्टरलाई अन्यत्र सार्न खोजिएको सुनिएको जनाउँदै विरोध जनाएका छन् । उनीहरूले जिल्लाका अन्य स्थानीय तहहरुले गाउँ–गाउँमा बर्थिङ सेन्टर स्थापना गरिरहँदा सदरमुकाम समेत रहेको फिदिम नगरपालिका भने २ वर्षदेखि सेन्टर बन्द हुँदा चुपचाप बसेको गुनासो गरे ।

स्वास्थ्यचौकी व्यवस्थापन समितिका अध्यक्ष हरिलाल तुम्रोक भने स्वास्थ्यचौकीको भवन निर्माण गरी स्वास्थ्यकर्मी बस्ने प्रबन्ध नभएसम्म बर्थिङ सेन्टर सञ्चालन गर्न कठिन भएको बताउँछन् । 

‘स्वास्थ्य चौकीलाई भवन अभाव भएकाले नयाँ भवन बनाई अहिलेको भवनलाई आवासका रूपमा प्रयोग गर्नुपर्छ भनेर नगरपालिकासँग माग गर्दै आएका छौं,’ उनले भने, ‘तर नगरपालिकाबाट अहिलेसम्म कुनै पनि बजेट परेको छैन ।’

बर्थिङ सेन्टरको सेवा बन्द भएपछि दरबन्दीमा आएका स्वास्थ्यकर्मी समेत आवासको समस्या देखेर २ हप्ता नबित्दै काज सरुवा गरी गएको उनले बताए ।

कमेन्ट गर्नुहोस्