ओलीको शुभकामना सन्देश- राजनीतिक र सामाजिक वृत्तमा व्याप्त नकारात्मक प्रवृत्तिलाई परास्त गरौँ

पूर्व प्रधानमन्त्री एवं नेकपा एमालेका अध्यक्ष केपी शर्मा ओलीले एक सन्देश जारी गर्दै दशैंको शुभकामना दिएका छन् । शुभकामना सन्देशमा उनले स्वास्थ्य सुरक्षा मापदण्ड अपनाएर दशैं मनाउन भनेका छन् । 


Advertisement

ओलीले शुभकामना सन्देशमा भनेका छन्, ‘बडादशैं लगायतका हाम्रा चाडपर्वहरू यत्तिकै प्रचलनमा रहेका होइनन् । विभिन्न ऐतिहासिक पृष्ठभूमिका आधारमा हाम्रा चाडपर्वहरुको विकास भएको छ । समाज निर्माण हुने क्रममा, सभ्यताहरु विकसित र सुगठित हुने क्रममा यस्ता चाडपर्वहरू निर्माण भएका हुन् । सामाजिक सुप्रबन्ध कायम गर्नका लागि निर्माण भएका यस्ता चाडपर्वहरू, समयक्रममा हासिल भएका अनुभव र अनुभूतिहरूबाट समृद्ध हुँदै प्रयोग र प्रचलनमा रहेका हुन् ।’


Advertisement

चाडपर्वहरु केवल पर्व र उत्सवहरु मात्रै नभएर सामाजिक प्रवन्धका आधार पनि भएको उनले बताएका छन् । ‘हाम्रो सभ्यता, हाम्रो संस्कृति र हाम्रा मूल्य मान्यताहरु यिनै सामाजिक प्रवन्धहरुका आधारमा विकसित भएका छन्’ ओलीले सन्देशमा भनेका छन्, ‘ त्यसैले यी चाडपर्वहरुका सकारात्मक अन्तर्यहरु, जो महान् र जीवन्त छन्, यिनलाई अपनाउनु र अगाडि बढाउनु आवश्यक छ । त्यसैले यस्ता पर्वहरुलाई नितान्त पुरातन मान्यताका रुपमा मात्रै बुझ्दा र अस्वीकार गर्दा सिङ्गो समाजलाई निरर्थक, निरश र प्रयोजनहीन जस्तो बनाउँछ ।’

चाडबाडका नाममा हुने गरेका केही नकारात्मक पक्षहरुलाई हटाउन  आवश्यक रहेको उनले बताएका छन । ‘औचित्य र आवश्यकताको वास्तै नगरी, आफ्नो सामथ्र्यको समेत ख्याल नगरी आँखा चिम्लिएर उत्सव मनाउँदा फजुल खर्चमा हौसिनेजस्ता अभ्यास कुनै पनि कोणबाट उचित होइनन् । यस्ता अभ्यासलाई सच्याएर हाम्रा चाडपर्वहरुलाई मितव्ययी र उचित बनाउन हामी सबै सजग र सचेत रहनु आवश्यक छ’, ओलीले सन्देशमा भनेका छन । 


Advertisement

उनले शुभकामना सन्देशमा थप भनेका छन, ‘हामीले देशलाई समृद्ध र जनतालाई सुखी बनाउने राष्ट्रिय आकाङ्क्षा पनि पूरा गर्नु छ । समृद्ध नेपाल, सुखी नेपालीको राष्ट्रिय आकांक्षा साकार पार्ने हाम्रो अभियानमा खडा गरिएका व्यवधान र राजनीतिक तथा समाजिक वृत्तमा परिव्याप्त नकारात्मक प्रवृत्तिहरुलाई एकतावद्ध भएर परास्त गर्ने दिशामा अघि बढ्न समेत म सबैमा आह्वान गर्दछु ।’

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्