चोलेन्द्र गएपछि अदालतमा प्रधानन्यायाधीशका लागि नयाँ शुद्ध कुर्सी राख्नुपर्छ- बद्रिबहादुर कार्की

चोलेन्द्र गएपछि अदालतमा प्रधानन्यायाधीशका लागि नयाँ शुद्ध कुर्सी राख्नुपर्छ- बद्रिबहादुर कार्की

पूर्व महान्यायाधिवक्ता एवं वरिष्ठ अधिवक्ता बद्रिबहादुर कार्कीले चोलेन्द्रशमशेर जबराले सर्वोच्च प्रधानन्यायाधीशको कुर्सी अपवित्र बनाएकोले नयाँ आउने बित्तिकै कुर्सी फेर्नुपर्ने बताएका छन् । आत्मसम्मान भएको वकिलले अहिलेका प्रधानन्यायाधीशलाई सम्माननीय भन्न नसक्ने उनले टिप्पणी गरे । 


Advertisement

प्रधानन्यायाधीश जबराको राजीनामा माग गर्दै सर्वोच्च अदालत परिसरमा धर्नापछि शुक्रवार बार प्रांगणमा आयोजित कार्यक्रमलाई सम्बोधन गर्दै कार्कीले भ्रष्टाचारको फ्याक्ट्री बनेको प्रधानन्यायाधीशले राजीनामा नगरेसम्म बारको आन्दोलन नरोकिने बताएका हुन् । 


Advertisement

‘भ्रष्टाचारमा सजाय गर्न बसेको संस्थाको प्रमुख आफैं भ्रष्टाचारको संरक्षण गर्न मिल्छ ? यस्तालाई आत्मसम्मान भएको वकिलले कसरी सम्माननीय भन्न सक्छ ?,’ कार्कीले भने, ‘अनाधिकृत ढंगले बसेका प्रधानन्यायाधीशले छोएको कुर्सी अपवित्र भएको छ । नयाँ आउने प्रधानन्यायाधीशले शुद्ध कुर्सी राख्नुपर्छ, त्यस्तो गन्ध भइसकेको छ ।’

५ दशक लामो न्यायिक अभ्यासका क्रममा आफू विगतमा यसरी आन्दोलनमा नआए पनि यसपटक बाध्य भएर आएको बताए । ‘न्यायपालिकाको सुधारमा बाहिरको हस्तक्षेप आवश्यक थिएन भन्ने सोचाइ राख्थेँ, तर जनसँगको कुरा जनयुद्ध र जनआन्दोलन भन्दा पनि कडा रहेछ,’ कार्कीले भने । 


Advertisement

न्यायालय शुद्धीकरणको आफूहरूको अभियानमा भ्रष्टका भूत प्रेत विभिन्न ठाउँबाट विभिन्न अवतारमा उत्रिने खतरा रहेको कार्कीले बताए । ‘धेरै शक्तिशाली भन्ने नेताको मुद्दामा प्रधानन्यायाधीशले थर्काइरहेका छन्, प्रधानन्यायाधीशले नेतालाई थर्काउन सक्ने, अन्य सर्वसाधारणको मुद्दामा कत्रो आतंक होला ?,’ कार्कीले भने । 

भ्रष्टाचारको फ्याक्ट्री बन्द गर्न सरकार र नेताबाट सम्भव नभएको भन्दै वकिलहरू निर्भीक रुपमा लाग्नु पर्ने बताए ।
 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्