दाङको घोराही कारागारबाट कैदी भागेको घटनाले तरंग ल्याएको छ । 

जेलको सुरक्षामा खटिएका सुरक्षाकर्मीले उपचार गर्ने नाममा जन्मकैद सजाय भोग्दै आएका दाङको राजपुर गाउँपालिका–३ का ३२ वर्षीय यमराज परियारलाई गत हप्ता भगाएको पुष्टि भएको छ । 

छालाको उपचार गर्न भनेर कारागारका नाइके समेत रहेका कैदी परियारलाई प्रहरी जवान धनबहादुर चौधरीले लु३४प ४१० नम्बरको मोटरसाइकलमा लिएर गएका थिए । कैदी भगाउनमा जेलर युवराज परियारको समेत संलग्न रहेको पाइएको छ ।

उपचारका लागि मोटरसाइकलको पछाडि राखेर अस्पताल लैजाने भनिए पनि प्रहरी चौधरीले होटलमा पुर्‍याएर भगाएका थिए । छालाको समस्या रहेको भन्दै राप्ती स्वास्थ्य विज्ञान प्रतिष्ठानमा जान दुवै कारागारबाट निस्किएका थिए । जिल्ला प्रहरी कार्यालय दाङका प्रमुख प्रहरी उपरीक्षक (एसपी) सुरेशप्रसाद काफ्ले प्रहरीकै चरम लापरवाहीले घटना भएको बताए । 

‘त्यो खुँखार अपराधी हो,’ काफ्लेले लोकान्तरसँग भने, ‘साढे ७ वर्षअघि आफ्नै प्रेमिकालाई झुण्ड्याई मारेर २० वर्ष (जन्मकैद) भोग्दै आएको हो । प्रहरीकै कमजोरीले घटना भएको हो । हामी सुक्ष्म अनुसन्धानमै छौं । घटनामा सुरक्षामा खटिएका प्रहरीकै कमजोरी छ ।’ 

कारागारबाट निस्केपछि प्रहरी जवान चौधरी र कैदी परियार घोराहीकै प्याराडाइस होटलमा पुगेर कफी खाएको, त्यसपछि सब्जीमण्डी पुगेर घोराहीकै बीपी चोक नजिकै रहेको थकाली भान्साघरमा २ जना महिला लिएर गएको अनुसन्धानबाट खुलेको छ । होटलबाट परियारले प्रहरी जवानको मोटरसाइकल लिएर भागेका थिए ।

अहिले जेलर र सुरक्षार्थ खटाएका सबै सुरक्षाकर्मीले परिवर्तन गरिएको छ । घटनापछि कारागारका जेलर युवराज परियारलाई जिल्ला प्रशासन कार्यालय र सुरक्षा प्रमुख, प्रहरी सहायक निरीक्षक रुद्रबहादुर सेन ठकुरीसहित सबै प्रहरीलाई जिल्ला प्रहरी कार्यालयमा तानिएको एसपी काफ्ले बताए ।

प्रशासनले जेलर परियारको ठाउँमा तुलसीपुर कारागारका जेलर अमर वलीलाई ल्याएको छ । प्रहरीले प्रहरी नायव निरीक्षक (सई) नन्दराम केसीको कमाण्डमा ७ जना प्रहरीलाई कारागारको भित्री सुरक्षार्थ खटाएको छ ।  

प्रहरी अनुसन्धानअनुसार चौधरी र परिवार छुट्टाछुट्टै कोठामा महिलासँग बसेका थिए । कफी पिएपछि कैदी परियारले होटलसम्म मोटरसाइकल आफैं चलाएर लगेका थिए । परियार दिउँसो १२ बजेतिर भागे पनि प्रहरी जवान चौधरीले अपराह्न ४ बजे मात्रै कैदी भागेको जानकारी गराएका थिए । भाग्न प्रयोग गरेको मोटरसाइकल लमही–६ बेलदमारको जंगलमा फेला परेको थियो । 

कैदी भागेको प्रकरणमा प्रहरी जवान चौधरीसहित ५ जना पक्राउ परेका छन् । घटनामा संलग्न भएका प्रहरी जवानसहित कारागारका कार्यालय सहयोगी, होटलमा पुगेका २ महिला र होटल सञ्चालकलाई प्रहरीले नियन्त्रणमा लिएको छ । उनीहरू कहाँ–कहाँ पुगे भन्ने सीसी टीभी फुटेज समेत प्रहरीले संकलन गरेको छ । 

फरार कैदी परियार कारागारका नाइके समेत थिए । उनले कैदीबन्दीको समस्या बुझ्ने र बाहिर कारागार प्रशासनसँग समन्वय गर्ने जिम्मेवारी पाएका थिए । उनी बेलाबेलामा तरकारी, मासु, अन्य सरसामान किन्न बजारसम्म पुग्ने गरेको पाइएको छ । काफ्लेले सुरक्षा र कारागार प्रशासनको चरम लापरवाहीसँगै मिलेमतोमा घटना भएको बताए ।

घटनाबारे सुक्ष्म ढंगले अनुसन्धान भइरहेको र दोषी सबैलाई कानूनअनुसार कारवाही हुनेमा ढुक्क हुन काफ्लेले आग्रह गरेका छन् ।