नेकपा एमालेको जिल्ला अधिवेशन नजिकिएसँगै नेतृत्वका लागि नेताहरूको दौडधूप शुरू भएको छ । आकांक्षीहरू नेता आफूलाई समर्थन खोज्दै दौडधूपमा छन् ।

यही पुस २३ गते लुम्बिनी प्रदेशका १२ वटै जिल्लामा एकसाथ हुने जिल्ला अधिवेशन अगाडि भोलि १७ गते अधिवेशनका लागि प्रतिनिधि छनौट हुँदैछन् । जिल्ला अध्यक्ष शिवराज सुवेदीले अध्यक्षमा नदोहोरिने बताइसकेका छन् ।

प्रदेशमा एमालेको बढी प्रभाव र शक्ति रहेको रूपन्देही एमालेको नेतृत्वका लागि जिल्ला कार्यालय सदस्य तेजेन्द्र केसी र अखिल नेपाल किसान महासंघको जिम्मेवारीमा रहेका यज्ञ गैरे प्रमुख दाबेदारको रूपमा अगाडि आएका छन् । 

त्यसैगरी एमाले जिल्ला उपाध्यक्ष पुरुषोत्तम घिमिरे, जिल्ला उपसचिव गोपाल राना, तिलोत्तमा नगर प्रमुख वाशुदेव घिमिरे पनि आकांक्षी हुन् । 

घिमिरे लामो समय तत्कालीन एमाले नेता माधव नेपाल समूहमा रहेका नेता हुन् । आकांक्षी आधा दर्जन भए पनि अन्तिममा केसी र गैरेमध्ये एकजना अध्यक्ष हुने एमाले जिल्ला नेताहरू बताउँछन् । केसीले एमाले र माओवादी एक हुँदा जिल्ला सहसंयोजकको भूमिका पनि निभाएका नेता हुन् । 

एमाले उपाध्यक्ष तथा पूर्व अर्थमन्त्री विष्णु पौडेल, सचिव छविलाल विश्वकर्मा र एमालेका प्रभावशाली नेता घनश्याम भुसालको गृहजिल्ला रूपन्देहीमा जिल्ला अध्यक्ष चयनको विषयलाई चासोका साथ हेरिएको छ । नेता केसीले आफू स्वाभाविक रूपमै जिल्ला अध्यक्षको दाबेदार भएको बताए ।

त्यस्तै पश्चिम नवलपरासीमा पनि अध्यक्षका लागि नेताहरूको दौडधूप चलेका छ । पार्टी जिल्ला अध्यक्ष तुलसी पासीले नेतृत्वमा पुनः नआउने आशय व्यक्त गरेका छन् । प्रदेश सचिवालय सदस्य दीपेन्द्र अधिकारी र जिल्ला सचिव थानप्रसाद गैरे पनि अध्यक्षका लागि आकांक्षी छन् । 

अधिकारीलाई पार्टीका जिल्लाका नेता तथा प्रदेशका पूर्व मन्त्री बैजनाथ चौधरीको साथ छ । एमाले जिल्ला उपसचिव राजनकुमार आचार्यले अधिकारी र गैरेमध्ये एकजना सर्वसम्मत रूपमा जिल्लाको नेतृत्वमा आउने बताए ।

उपाध्यक्षमा बर्दघाट नगर प्रमुख धिरज शर्मा र सचिवमा आचार्य हालका उपसचिव आचार्यको सम्भावना छ ।

त्यसैगरी कपिलवस्तुमा पनि नेतृत्वका लागि नेताहरू अगाडि सरेका छन् । प्रदेश कमिटी सदस्य डम्बर शर्मा र जिल्ला उपाध्यक्ष बाबुराम खनालले अध्यक्षमा दाबी गरेका छन् ।

विद्यार्थी राजनीतिबाट आएका शर्मा एमाले प्रदेश कमिटी सदस्य पनि हुन् । त्यस्तै खनाल माधव नेपाल समूहमा रहेका थिए । 

अध्यक्ष झविलाल पोखरेल नेतृत्वमा पुनः आउने तरखरमा लागेपछि शर्मा र खनालले नेतृत्वका लागि आपूm निकट नेता र कार्यकर्तालाई आफ्नो पक्षमा माहोल बनाउन आग्रह गर्दै आएका छन् । 

अर्घाखाँचीमा पनि नेतृत्वका लागि पिताम्बर भुसाल, तेजबहादुर रायमाझी र जीवनारायण कोइराला नेतृत्वमा लागि आकांक्षी छ । रायमाझी एमाले नेता टोपबहादुर रायमाझीका भतिज हुन् । अर्घाखाँचीमा पूर्व माओवादीबाट एमालेमा आएका नेताहरूको पनि राम्रो प्रभाव छ ।

जिल्लाको नेतृत्व चयनमा नेता चेतनारायण आचार्यको समर्थनको अर्थ रहने एमाले नेताहरू बताउँछन् । उनी भुसाललाई अध्यक्ष बनाउने गरी लागेका छन् । भुसाल हाल उपाध्यक्ष हुन् ।

कोइरालाले एमालेमा गुटगत राजनीति हुँदा समानान्तर कमिटी पनि बनाएका थिए । अर्घाखाँचीमा पार्टीको इञ्चार्ज पूर्व माओवादी तर्फका चन्द्रबहादुर खड्का भएकाले अध्यक्षमा भुसाल हुनुपर्ने मत बलियो छ ।

त्यस्तै एमालेका प्रभावशाली नेताहरू उपमहासचिव प्रदीप ज्ञवाली र सचिव गोकर्ण विष्टको गृहजिल्ला गुल्मीमा बालसिंह काउछा र सोमनाथ सापकोटा मुख्य प्रतिस्पर्धी देखिएका छन् ।

उपाध्यक्ष काउछालाई ज्ञवाली र सचिव सापकोटालाई विष्टको समर्थन रहेको बताइन्छ । हालका अध्यक्ष मधुकृष्ण पन्तले पनि पाएसम्म दोहोरिने इच्छा व्यक्त गरेका छन् । पन्त छत्रकोट गाउँपालिकाका अध्यक्ष पनि हुन् ।

गुल्मीमा एमालेको बलियो प्रभाव रहेकाले आउँदो निर्वाचनमा पार्टी पंक्तिलाई सशक्त परिचालन गर्न सक्ने नेतृत्व जिल्लाले खोजेको नेताहरू बताउँछन् ।

यसैगरी पाल्पामा नेतृत्वका लागि नेताहरू खुलेर लागेको देखिएको छैन । अध्यक्ष नारायण आचार्य नै दोहोरिने सम्भावना रहेको चर्चा छ ।

उपाध्यक्ष मोहन थापा र सचिव ओमबहादुर घर्तीले खासै चासो नदेखाएपछि अध्यक्ष दोहोरिने सम्भावना बढेको एक नेताले बताए ।

सांसद सोमप्रसाद पाण्डे नेकपा एकीकृत समाजवादीमा गए पनि जिल्लाका कार्यकर्ताहरूले खासै एमाले छाडेनन् । 

अर्को स्टोरीमा लुम्बिनी प्रदेशका बाँकी ६ जिल्लाको समाचार प्रस्तुत गरिने छ । लुम्बिनी प्रदेशमा १२ जिल्ला रहेका छन् ।