युक्रेनविरुद्ध रुसले चलाइरहेको सैन्य कारवाही केही समय अझै लम्बिने रुसका राष्ट्रपति भ्लादिमिर पुटिनले बताएका छन् । 

बुधवार काउन्सिल अफ सिभिल सोसायटी यान्ड ह्युमन राइट्सको बैठकमा उनले युक्रेनमा रुसले लिएको सबै लक्ष्य पूरा हुन समय लाग्ने बताए । तर रुसले प्रमुख लक्ष्य हासिल गरिसकेको उनको भनाइ छ । 

यो द्वन्द्व सन् २०१४ मा शुरू भएको पुटिनले दाबी गरे । त्यो वर्ष युक्रेनमा कू गरेर तत्कालीन राष्ट्रपतिलाई अपदस्थ गरिएको थियो । 

डोनबास क्षेत्रमा दुई स्वघोषित गणतन्त्र डोनेत्स्क र लुगान्स्कको प्रतिरक्षाका लागि फेब्रुअरीमा रुसले आक्रमण गर्नुपरेको पुटिनको भनाइ छ । ती दुई गणतन्त्रका साथै खर्सन र जापोरिजाले रुसमा मिसिनका लागि मत दिइसकेका छन् । 

‘यी नयाँ भूभागहरू रुसका लागि प्रमुख सफलता हुन्,’ पुटिनले बताए । ‘महान् सम्राट् पिटरले पनि आजोभ सागरमा पहुँचका लागि कोशिश गरेका थिए अहिले त्यो सागर रुसको अंग बनेको छ ।’

‘सबभन्दा महत्त्वपूर्ण कुरा, ती ठाउँमा बस्ने मान्छेले जनमतसंग्रहमार्फत आफूहरू रुसमा बस्न चाहेको बताए र उनीहरू हाम्रो संसारको एक अंग हुन्,’ पुटिनले भने । ‘उनीहरू अहिले हामीसँग छन्, त्यही नै यस कारवाहीको सबभन्दा ठूलो उपलक्धि हो ।’

थप सैनिक परिचालनको चर्चा अर्थहीन रहेको पनि पुटिनले बताए । अहिले ३ लाखभन्दा बढी जगेडा सैनिकहरूलाई सेनामा दर्जा दिएर भित्र्याइएको छ । त्यो संख्या पर्याप्त भएको पुटिनले बताए । 

अझ डोनबासमा वर्षौंदेखि लड्दै आएका कतिपय विद्यार्थीले पढाइ सक्नका लागि सैन्य सेवा परित्याग गर्न खोजेका छन् ।

अहिले सैन्य कारवाहीमा आपत्ति जनाउने पश्चिम युरोपेली नेताहरूलाई आफूले सन् २०१४ पछि युक्रेनमा शान्ति प्रक्रियाको प्रत्याभूति दिलाउन भन्दा उनीहरू मौन बसेको आरोप पुटिनले लगाए ।