काठमाडौँ । प्रधानमन्त्रीलाई दिएको दुई दिने अल्टिमेटम सकिनै लाग्दा राष्ट्रिय स्वतन्त्र पार्टी (रास्वपा)को बैठक जारी छ । डेढ घण्टायता पार्टी कार्यालयमा रास्वपाको केन्द्रीय समिति र संसदीय दलको संयुक्त बैठक चलिरहेको हो। 
राति करिब ९ बजेदेखि सुरु भएको बैठकमा पार्टी सरकारबाट बाहिरिने कि सम्झौता गर्दै सरकारमै बसिरहने भन्नेबारे विचारमिमर्श भइरहेको एक नेताले जानकारी दिए । 

रास्वपाका सभापति रवि लामिछानेलाई माओवादी केन्द्रका अध्यक्ष समेत रहेका प्रचण्डले शनिबारको भेटमा नयाँ प्रस्ताव गरेका थिए । प्रचण्डले गृहको साटो रास्वपालाई भौतिक पूर्वाधार तथा यातायात व्यवस्था मन्त्रालय लिन प्रस्ताव गरेका थिए । 

रास्वपाले गृह नै पाउनुपर्ने भनेर सरकारलाई दुई दिने अल्टिमेटम दिएको सन्दर्भमा प्रचण्डले आज नयाँ प्रस्ताव गरेपछि सोही विषयमा छलफल केन्द्रीत भएको ती नेताले बताए । 
यसअघि बिहीबार बसेको रास्वपाको  बैठकले आफ्ना माग पूरा गर्न प्रधानमन्त्रीलाई २ दिनको अल्टिमेटम दिएको थियो ।

दुई दिनपछि पनि आफ्नो माग पुरा नभए जस्तो सुकै निर्णय गर्न पनि तयार रहेको रास्वपाले चेतावनी दिएको थियो । अल्टिमेटमलगत्तै रास्वपाका सभापति लामिछानेले एमाले अध्यक्ष केपी  ओली र प्रधानमन्त्री प्रचण्डसँग पटक पटक छलफल गरिसकेका छन् । यो विषयमा ओलीले प्रचण्डसँग पनि छुट्टै छलफल गरेका छन् । 

रास्वपा प्रधानमन्त्रीको नयाँ प्रस्ताव मानेर सरकारमै रहिरहन्छ कि त्यसलाई अस्वीकार गर्दै बाहिरिने निर्णय गर्छ भन्नेमा धेरैको चासो छ । रास्वपाका नेताहरुले आजको बैठकले ठोस निर्णय लिने प्रतिक्रिया दिँदै गम्भीर छलफल भइरहेकाले बैठक लम्बिन सक्ने बताएका छन् ।