राष्ट्रिय स्वतन्त्र पार्टी (रास्वपा) को केन्द्रीय समिति र संसदीय दलको संयुक्त बैठकमा सभापति रवि लामिछानेले प्रधानमन्त्री प्रचण्ड र एमाले अध्यक्ष केपी शर्मा ओलीसँग दुई दिनको बीचमा भएको छलफलबारे ब्रिफिङ गरेका छन् । 

बिहीबार आफ्नो माग पुरा गर्नका लागि रास्वपाले प्रधानमन्त्री प्रचण्ड र उच्चस्तरीय राजनीतिक संयन्त्रका संयोजक एमाले अध्यक्ष केपी शर्मा ओलीलाई दुई दिनको अल्टिमेटम दिएको थियो । बैठकले यो बीचमा ओली र प्रचण्डसँग छलफलका लागि लामिछानेलाई नै पार्टीले जिम्मा दिएको थियो । 

यो बीचमा लामिछानेले ओली र प्रचण्डसँग छुट्टाछुट्टै छलफल गरेका थिए भने ओलीसमेतको सहमतिमा प्रचण्डले लामिछानेसँगको भेटमा गृहको साटो भौतिक पूर्वाधार तथा यातायात व्यवस्था मन्त्रालय लिएर सरकारमै रहिरहन प्रस्ताव गरेका थिए । 

यी सबै विषयबारे रविले बैठकमा ब्रिफिङ गर्दै सरकारमा रहँदा र नरहँदाको फाइदा तथा बेफाइदाबारे बेलिविस्तार प्रस्तुत गरेको एक केन्द्रीय सदस्यले बताए । 
उनले आफ्नो ब्रिफिङसहितको धारणा राखेपछि नेताहरुले पनि आफ्नो राय दिने क्रम चलिरहेको छ । 

शनिबार राति ९ बजेदेखि पार्टी कार्यालयमा सुरु भएको बैठक राति अबेरसम्म चलिरहेको छ ।