राष्ट्रिय स्वतन्त्र पार्टी (रास्वपा)ले  माग पूरा गर्नका लागि आफूहरुले प्रधानमन्त्रीलाई कुनै अल्टिमेटम नदिएको दाबी गरेको छ । प्रधानमन्त्री प्रचण्ड र एमाले अध्यक्ष केपी ओलीले रास्वपाको मागको विषयमा दुई दिन समय मागेकाले मात्रै आफूहरुले दुई दिन कुर्ने भनेको सो पार्टीको दाबी छ । 

‘त्यो दुई दिन समय हामीले दिएको होइन । हामीलाई अस्तिको दिन हामी बैठक बसिरहँदा राजनीतिक संयन्त्रको संयोजक र प्रधानमन्त्रीले माग्नु भएको हो’, नेता सन्तोष परियारले भने, ‘त्यो हाम्रो अल्टिमेटम होइन, त्यो उहाँहरुले दुई दिन छलफल गरौँ है भनेर भन्नु भएको हो । यो बीचमा छलफल भयो र हाम्रा यो मात्रै नभएर अन्य कुराहरु पनि रहेका छन् ।’ 

उनले सत्ता साझेदार दलमा मन्त्रालयका साथसाथै राष्ट्रपति, उपराष्ट्रपति निर्वाचन र उपनिर्वाचनका विषयमा पनि छलफल भइरहेको बताए । उनले सरकारको विषयमा आइतबार बस्ने बैठकले निर्णय लिने पनि बताए । 

यसअघि बिहीबार रास्वपाले दुई दिनभित्र आफूहरुको माग पुरा नभए जस्तोसुकै निर्णय पनि लिनसक्ने बताएका थियो । जुन समय शनिबार नै सकिएको छ । सभापति रावि लामिछानेले नागरिकता अवैध ठहर भएपछि सर्वोच्चको फैसलाअनुसार सांसदसँगै गृह मन्त्रालय गुमाएका थिए । लगत्तै  काठमाडौँ जिल्ला अदालतबाट उनको नागरिकता कायम भएसँगै उनले गैरसांसदको रुपमा आफूलाई फेरि गृहमन्त्रीकै शपथ गराउन माग गरेका थिए । 

तर प्रधानमन्त्री प्रचण्डले रविको विषयमा अझै पासपोर्टको विवाद बाँकी रहेकाले सर्वोच्चको फैसलाको पूर्णपाठ नआउँदासम्म कुर्नुपर्ने बताउँदै आएका छन् । यसपछि प्रधानमन्त्रीको अडानबाट चिढिएको रास्वपाले सरकारबाट बाहिरिने चेतावनी दिँदै आएपनि निर्णय भने गर्न नसकेको हो ।