नेपाली कांग्रेसका महामन्त्री तथा सङ्घीय सांसद विश्वप्रकाश शर्माले पूर्ण लोकतान्त्रिक गणतन्त्र स्थापना र १० वर्ष लामो कहालीलाग्दो सशस्त्र द्वन्द्व अन्त्यका लागि पु¥याएको ऐतिहासिक योगदानका कारण स्व गिरिजाप्रसाद कोइराला सबै राजनीतिक दलका लागि अभिभावक बनेको बताएका छन् ।

आज गृहजिल्ला झापाको मेचीनगरमा नेपाली कांग्रेस झापाका पूर्वउपसभापति राम कट्टेलको ‘जीवनका मोडहरू’ नामक कविता सङ्ग्रहको विमोचन गर्दै महामन्त्री शर्माले पूर्वप्रधानमन्त्री कोइरालाको १३ औँ स्मृति दिवसमा उनको योगदानहरूको चर्चा गरे ।

“पूर्वप्रधानमन्त्री स्व गिरिजाबाबुले नेतृत्व गरेकै कारण २०६२/०६३ को जनान्दोलन सफल भयो र तत्कालीन विद्रोही नेकपा माओवादीसँग शान्ति सम्झौता भयो”, महामन्त्री शर्माले भने, “उहाँले पार्टीको स्वार्थभन्दा माथि उठेर देश, जनता र लोकतान्त्रिक गणतन्त्रको हितका लागि जीवनको उत्तरार्धमा जुन ऐतिहासिक निर्णय लिनुभयो, त्यही कारण उहाँ सबै राजनीतिक दलका लागि अभिभावक बन्नुभयो ।”

महामन्त्री शर्माले झापा जिल्ला राजनीतिक र साहित्यिकरूपमा सिर्जनशील भूमि भएको धारणा व्यक्त गरे ।

विमोचित कृतिमा एक सय १० वटा कविता रहेको र अधिकांश कविता राजनीतिक र सामाजिक पृष्ठभूमिमा रचना गरिएको समीक्षक विनोद खनालले बताए ।