राम विनयको पुनर्जन्म प्रकाशित​​

प्रगतिवादी साहित्यकार राम विनयको नवौं पुस्तक पुनर्जन्म प्रकाशित भएको छ ।

कोभिड महामारीको समयमा आफ्ना पिता तथा दुई भाइहरूको मृत्यु भएको विनयको परिवारमा सबैलाई कोभिड भएको थियो ।

लेखक विनय कोभिडको कारण गम्भीर भएर झन्डै तीन हप्ता अस्पताल बस्नु परेको थियो ।

आईसीयूमा जीवनका अन्तिम सास फेर्दै बाँचेका विनयले अत्यन्तै कारुणिक संस्मरण लेखेका छन् । आफ्नो परिवारमा भएको वज्रपात तथा आफूले सहनुपरेको पीडाबारे उनले आफूलाई निचोरेर लेखेको बताएका छन् ।

'अस्पतालमा रहँदा बाहिरबाट एक जना भाइको निधन थाहा पाएँ, बुबा र अर्को भाइको निधन अस्पतालबाट डिस्चार्ज भएपछि मात्र थाहा पाएँ,' उनले भने, 'घरमा सबैलाई कोरोना संक्रमण भएको पनि घर आएपछि थाहा पाएँ  ।  मैले आईसीयूमा हरेक पल जीवन र मृत्युको रेखामा संघर्ष गरें ।'

कविता, नियात्रा तथा निबन्ध विधामा कलम चलाउने विनय साहित्य सन्ध्या, जनसाहित्य संघलगायत संस्थामा आबद्ध छन्  ।

उनले प्रतिभा पुरस्कार, महाकवि देवकोटा पुरस्कार, रमेश विकल सम्मान, युद्धप्रसाद मिश्र सम्मान, प्रगतिशील लेखक संघ सम्मान आदि दर्जनौं पुरस्कार तथा सम्मान प्राप्त गरेका छन् ।

पुनर्जन्म (संस्मरण) शिखा बुक्सले प्रकाशन गरेको हो  ।