साहित्यमा ‘आफूविरुद्ध आफै’अभियान शुरू

साहित्यमा क्रियाशील स्रष्टाहरूले ‘आफूविरुद्ध आफै’अभियान शुरू गरेका छन् । साहित्यिक क्षेत्रमा क्रियाशील स्रष्टाहरूले राजधानीमा एक कार्यक्रम गरी अभियानको शुरूआत गरेका हुन् ।  

अभियानले तीन वटा उद्देश्य तय गरेको छ । समकालीन लेखनका दिशा र प्रवृत्तिगत वैशिष्ट्यबारे विमर्श गर्ने, लेखनको विषय वस्तु र शिल्प विन्यासमा नवीनताको खोजी गर्ने तथा आफ्नै लेखनको सीमा र शक्तिबारे आत्म समीक्षा गर्नेगरी अभियान शुरू भएको अभियन्ता साहित्यकार आरएम डङ्गोलले बताए । 

साहित्यकारहरू प्रशंशाको भोका हुन्छन् भन्ने मान्यतालाई चिर्दै यो अभियान अघि बढ्ने उनको भनाइ छ । ‘यो अभियान कसैप्रति लक्षित छैन, आफ्नै लेखनप्रति लेखकहरू जिम्मेवार हुनपर्छ भन्ने उद्देश्य हो’, कवि डङ्गोलले भने। 

उनका अनुसार अभियानको संयोजकमा साहित्यकार नवराज रिजाल रहेका छन् ।

जसको सदस्यहरूमा आरएम डङ्गोल, छविरमण सिलवाल, होमशंकर बास्तोला, दीपक विहीन, बोधराज पौडेल र प्रतिरोध कार्की रहेका छन् । 

कार्यक्रममा बास्तोलाले अभियानको उद्देश्य, लक्ष्य र गन्तव्यबारे जानकारी गराउँदै समसामयिक र समकालीन नेपाली साहित्यिक लेखनमा  लेखकहरू स्वयम जिम्मेवार हुनु पर्ने धारणा राखेका थिए ।

साथै अभियानको पहिलो दिन कवि प्रतिरोध कार्कीको ‘घामको पहाड’कविता सङ्ग्रहमाथि प्रमुख वक्ताको रूपमा साहित्यकार डङ्गोलले समीक्षा गरेका थिए । 

उनले सङ्ग्रहभित्र रहेका कवितामाथि टिप्पणी गर्दै लेखकलाई भरपुर लेखकीय सुझाव दिएका थिए । त्यसैगरी समीक्षक बोधराज पौडेल होमशंकर बास्तोला, छविरमण सिलवाल, दीपक विहिनले  कृतिमाथि टिप्पणी गरेका थिए ।