बुटवलमा मगर साहित्य महोत्सव हुँदैः कविता प्रतियोगितादेखि चित्रकला प्रदर्शनीसम्म

मगर कला साहित्यको प्रचार गर्ने उद्देश्यसहित बुटवलमा पहिलोपटक मगर साहित्य महोत्सव हुने भएको छ । मगरात अध्ययन केन्द्र र नेपाल महिला मगर संघ रुपन्देहीले आगामी मंसिरमा ‘प्रथम मगर साहित्य महोत्सव’ गर्न लागेका हुन् । बुधवार बुटवलमा पत्रकार सम्मेलन गरी मंसिर २१ र २२ गते महोत्सव गर्न लागिएको जानकारी दिइएको हो । 

‘आफ्नो कथा आफैँ लेखौँ’ नारासहित पश्चिम क्षेत्रमै पहिलोपटक मगर साहित्य महोत्सव आयोजना गर्न लागिएको आयोजकले जनाएका छन् । 

दुई दिनसम्म चल्ने महोत्सवमा मातृभाषा कविता प्रतियोगिता, पुस्तक प्रदर्शनी तथा विमोचन, चित्रकला प्रदर्शनी तथा बिक्री, मौलिक नृत्य प्रदर्शन, आदिकवि जीतबहादुर सिँजालीमगर/रेखबहादुर सारूमगर साहित्य पुरस्कार र गोरेबहादुर खपाङ्गी सामाजिक योगदान पुरस्कार वितरण गरिने महोत्सव समितिका प्रवक्ता शंकर गाहाले बताए ।

यस्तै महोत्सवमा प्राचीन सामग्रीको प्रदर्शन, विद्घत प्रवचन, संवाद तथा बहस, अभिलेखनलगायत विविध रचनात्मक कार्यक्रम गरिने छ ।

सामाजिक संस्था स्थापना भएको ३३ वर्षमा साहित्यिक क्षेत्रमा रुपन्देहीमै पहिलोपल्ट कार्यक्रम आयोजना हुन लागेको उनले बताए । ‘मगर साहित्य काठमाडौं र पूर्व क्षेत्रमा हुने गरेको भएपनि पश्चिममा भने पहिलोपटक हुन लागेको हो,’ उनले भने ।

कार्यक्रमको संवाद तथा बहस कार्यक्रममा पूर्वडीआईजी पार्वती थापा, निर्देशक अनिल बुढा, मानवशास्त्री सुरेश ढकाल, महावीर पुन, युवा चलचित्र निर्देशक गोपाल आचार्य, हरि बुढा लगायत सहभागी हुने निश्चित भएको प्रवक्ता गाहाले बताए । महोत्सवमा स्थानीय साहित्यकारहरूको समेत सहभागिता रहने उनले जानकारी दिए । 

यसैगरी कार्यक्रममा हुने गाला राउन्डमा मास्टर मित्र सेन, अरुण थापा, क्रान्ति आले, हेमन्त रानाका मगर गीतहरू प्रस्तुत गरिने उनले बताए ।

कार्यक्रममा महोत्सव आयोजक समितिका सदस्य यम रानाले साहित्य क्षेत्र सबल र मजबुत भएमात्र समाज सबल हुने भन्दै पुर्खाबाट नै उत्कृष्ट साहित्यको इतिहास बोकेका आफूहरू यसको जगेर्नामा लागेको बताए । 

मातृभाषा कविता प्रतियोगिताअन्तर्गत मगर भाषामा लेखिएका कविताहरूको प्रतियोगिता हुनेछ । कार्यक्रममा संघका अध्यक्ष निर्मला थापाले कार्यक्रमलाई भव्य र सभ्य रुपमा सम्पन्न गर्न सबैको साथ र सहयोग जरुरी रहेको बताइन् ।