१५ दिन थपियो सहकारी ठगी छानबिन विशेष समितिको म्याद

सहकारी संस्थाको बचत दुरुपयोग सम्बन्धमा छानबिन गर्न गठित संसदीय विशेष समितिको म्याद १५ दिन थप भएको छ ।

मंगलवार बसेको प्रतिनिधिसभाको बैठकले भदौ २२ गतेदेखि समितिको म्याद १५ दिन थप गर्ने प्रस्ताव पारित गरेको हो । तीन महिनाको समय पाएर जेठ १५ गते गठन भएको समितिले २३ गतेदेखि काम शुरू गरेको थियो । 

मंगलवार बसेको बैठकमा समितिका सभापति सूर्य थापाले विकराल राष्ट्रिय समस्या बनिरहेको सहकारी संकटबारे प्रतिवेदन बनाउन केही समय आवश्यक रहेको बताएका थिए । उनले समितिले बिदाको दिन र कार्यालय समयभन्दा पछि मध्यरातसम्म काम गर्दा पनि प्राप्त उजुरीको तथ्य जाँच्ने काम बाँकी रहेको बताए । 

समितिका ५१ बैठक भएको र त्यसमा सहकारी ठगीको आरोप लागेका ५० जनासँग सोधपुछ गरिएको उनले बताए ।