सहकारी पीडकले आन्दोलनको अगुवाई गरिरहेको मन्त्रीको आरोप

भूमि व्यवस्था, सहकारी तथा गरिबी निवारण मन्त्री बलराम अधिकारीले सहकारी समस्या समाधानका लागि भइरहेको आन्दोलनप्रति कठोर टिप्पणी गरेका छन् ।

बैंकबाट कम ब्याजमा ऋण लिएर सहकारीमा बढी ब्याज लगाएर खाइरहेकाले पनि पीडित हुँ भन्दै आन्दोलन गरिरहेको आरोप लगाएका हुन् ।

बुधवार सहकारी पत्रकार समाजको १४ औँ स्थापना दिवसको कार्यक्रममा बोल्दै मन्त्री अधिकारीले भने, ‘सहकारीहरूको छाता सङ्गठन सहकारी महासंघ छ । सहकारीको समस्या त्यहाँ राखेर त्यहाँमार्फत आयो भने एकरुपता हुन्छ । सहकारीमा एउटै प्रकृतिका मान्छेहरू छैनन् ।'

उनले थपे, 'एकथरीका आफूसँग धेरै भएको सम्पत्ति सहकारीमा  लगेर राख्ने । अर्को भनेको बैंकबाट कम ब्याजमा लिने र सहकारीमा बढी ब्याजमा लगाउने । अनि त्यो बिचको नाफा खाइराख्ने छन् । सहकारीमा आन्दोलन पनि त्यस्तैले गरिरहेका छन् ।'

उनले पीडितको अगुवाई पीडकले गरिरहेको आरोप लगाए । 'पीडकले आन्दोलन किन गर्छन् ? आन्दोलनको अगुवाई गर्यो भन्ने पनि भयो, पीडित जनताबाट फाइदा लिन पनि पाइने भयो । अर्को भनेको आन्दोलन गरेजस्तो गरेपछि आफ्नो उद्देश्य पुरा पनि हुने भो ।'

उनले आफू मन्त्री हुनेबित्तिकै आन्दोलन शुरू भएको र आफूले वार्ता गरेको बताए । 'वार्तामा ८ बुँदे सहमति गरियो । तीमध्ये एक हप्ताभित्रै सात वटा बुँदा कार्यान्वयनमा गइसकेको छ । प्रतिनिधि  सभाले सहकारी छानबिनसम्बन्धी अयोग बनाएको छ । त्यसले पनि समस्या सामाधान गर्नेछ ।'