समाजमा अराजकता र अनुशासनहीनता फैल्याउने प्रयत्न स्वीकार्य हुन्न- ओली

प्रधानमन्त्री एवं नेकपा एमालेका अध्यक्ष केपी शर्मा ओलीले समाजमा अराजकता फैल्याउने कोशिश भइरहेको बताएका छन् ।

नयाँ सरकारले जनतामा आशा जगाउने काम शुरू गरेलगत्तै अराजकता मच्चाउने प्रयास भइरहेको उनको भनाइ छ । 

पार्टी पोलिटब्युरो बैठकलाई बुधबार समापन सम्बोधन गर्दै ओलीले विधिको शासन र आफूहरू नागरिक सर्वोच्चताको पक्षमा रहे पनि अराजकतालाई स्वीकार नगर्ने बताएका हुन् ।

‘समाजमा अराजकता र अनुशासनहीन गतिविधि बढेको छ । हामी नागरिक सर्वोच्चताको पक्षमा छौं, विधिको शासन मान्छौं । लोकतान्त्रिक मूल्य मान्यता अनुरूप अगाडि बढ्छौं । कुनै पनि निरंकुश, अराजक र अनुसाशनहिनतालाई अस्वीकार गछौं,’ बैठकमा ओलीको भनाइ उद्धृत गर्दै प्रचार विभाग प्रमुख राजेन्द्र गौतमले भने ।

हिजोको बैठकमा पनि ओलीले अराजकता फैल्याउने कोशिश भइरहेको र त्यसको ट्याकल गर्न सरकार सक्षम रहेको बताएका थिए ।

कांग्रेससहितको नयाँ सरकार बनेपछि जनतामा आशा जागेको र अर्थतन्त्र सुधार उन्मुख रहेको बैठकमा बताए ।

ओलीले एमाले के हो भन्ने कुरा मंसिरको उपचुनावमा देखाउने बताए ।

‘एमाले नीतिगत रूपमा स्पष्ट छ, लिएका नीति सही छन् । जग र जरा भएको पार्टी हो । इतिहासको विरासत बोकेर सशक्त उभिएका छौं,’ ओलीले भने ।

बैठकमा महासचिव शंकर पोखरेलले पेश गरेको ‘निर्णायक राष्ट्रिय शक्ति निर्माणका लागि वार्षिक कार्ययोजना’बारे ५१ जना सदस्यले धारणा राखेका थिए ।