कार्यकर्तालाई ओलीको निर्देशन– पार्टी ढल होइन, कि राजनीति गर्नुस् कि इन्जोय रोज्नुस्

नेकपा एमालेका अध्यक्ष केपी शर्मा ओलीले पार्टीमा अनुशासनहीन आचरण र चरित्र स्वीकार नहुने बताएका छन् । उनले राजनीति या इन्जोय (मनोरञ्जन) एउटा विकल्प रोज्न सुझाव दिए ।

पार्टीमा अनुशासनहीनता, नैतिकहीनता र अराजकता बढेको भन्ने गुनासो बढेपछि ओलीले पार्टी सबै प्रदूषण मिसाउने ढल नभएको टिप्पणी गरेका हुन् ।

‘पार्टीभित्र आचरणहीन, नैतिकहीन र चरित्रहीन कुरा स्वीकार्य हुँदैन,’ बुधबारको बैठकमा ओलीको भनाइबारे प्रचार विभाग प्रमुख राजेन्द्र गौतमले भने, ‘यो पार्टी कुनै ढल होइन । या राजनीति गर कि इन्जोय गर । दुवै कुरा सम्भव हुँदैन ।’

पार्टीका कतिपय नेता कार्यकर्ताको आचरणमा प्रश्न उठेको भन्दै बैठकमा आलोचना भएको थियो।

ओलीले कम्युनिस्ट राजनीति गर्ने मान्छे नैतिक आचरणमा बस्नुपर्ने बताए ।

पार्टीलाई सुद्दढ राष्ट्रिय शक्ति बनाउन नेता कार्यकर्ता अनुशासित आचरणमा बस्नु पर्ने उनको भनाइ थियो ।