मावलीघरमा भोज खान आएका तीन बालकको पोखरीमा डुबेर मृत्यु

मावलीघरमा भोज खान आएका तीन बालकको पोखरीमा डुबेर मृत्यु भएको छ । 

धनुषाको लक्ष्मीनिया गाउँपालिका-७ लक्ष्मीनियामा रहेको पोखरीमा डुबेर बुधबार साँझ उनीहरूको मृत्यु भएको इलाका प्रहरी कार्यालय महेन्द्रनगरका प्रहरी निरीक्षक सोनुकुमार साहले जानकारी दिए ।

मृत्यु हुनेमा १० वर्षीय आदित्यकुमार साह,  नौ वर्षीय आयुष साह र १४ वर्षीय सुशान्त साह रहेका छन् । 

मावलीतर्फका हजुरबुबा महावीर साहको घरमा भोज खान आएका बालकहरू नजिकैको पोखरीमा पौडी खेल्न जाँदा डुबेको आशङ्का गरिएको छ । मृतक बालकहरू साहका तीनवटा छोरीका छोरा रहेको बताइएको छ । 

साँझ करिब ७:३० बजेतिर पोखरीमा बालकको शव भेटिएको थियो । सबै जना भोजमा व्यस्त रहेका बेला उनीहरू पौडी खेल्न गएका थिए ।

तीनै जनाको शव परीक्षणका लागि प्रादेशिक अस्पताल जनकपुरधाममा राखिएको वडाध्यक्ष गङ्गा साहले बताए । 

घटनाबारे थप अनुसन्धान भइरहेको जिल्ला प्रहरी कार्यालय धनुषाले जनाएको छ ।