आर्टिफिसियल इन्टेलिजेन्स (एआई) का क्षेत्रमा हालसम्म 'हस्तक्षेप नगर्ने' नीति अपनाउँदै आएको ट्रम्प प्रशासनले अब यसमाथि कडा नियन्त्रण गर्ने संकेत दिएको छ। ओपनएआईका टुलहरू प्रयोग गरी भएका पछिल्ला साइबर सुरक्षा उल्लंघनका घटनापछि राष्ट्रपति डोनाल्ड ट्रम्पले एआई प्रविधिमाथि सरकारी निगरानी र नियन्त्रण बढाउनेबारे विचार भइरहेको बताएका हुन् ।
बुधबार ह्वाइट हाउसमा आयोजित एक कार्यक्रममा बोल्दै राष्ट्रपति ट्रम्पले भने, 'हामी एआईलाई सूक्ष्म रूपमा हेरिरहेका छौं, हामी यसमाथिको नियन्त्रणका उपायबारे विचार गरिरहेका छौं। साथै, हामी यस क्षेत्रमा अमेरिका नै विश्वको नेतृत्वकर्ता रहोस् भन्ने सुनिश्चित गर्न चाहन्छौं।'
ट्रम्पले एआईमाथि नियन्त्रण आवश्यक भए पनि यो कदम निकै सावधानीपूर्वक चाल्नुपर्ने बताए। उनले नियन्त्रणका नाममा अमेरिका चीनभन्दा पछाडि पर्न नहुनेमा जोड दिए। 'चीनमा एआईमाथि लगभग कुनै नियन्त्रण छैन, त्यहाँ यो निकै स्वच्छन्द रूपमा अघि बढिरहेको छ। हामी यस्तो नियन्त्रण चाहँदैनौं जसले गर्दा अचानक हामी चीनभन्दा दोस्रो स्थानमा पुगौं,' ट्रम्पले थपे।
पछिल्लो एक हप्तामा ओपनएआईले आफ्ना टुलहरूले तोकिएको कार्यक्षेत्रभन्दा बाहिर गएर अन्य कम्पनीका निजी प्रविधिहरूमा अनधिकृत पहुँच पुऱ्याएको दुईवटा घटनाको जिम्मेवारी लिएको छ। वासिङ्टन भ्रमणका क्रममा ओपनएआईका प्रमुख कार्यकारी अधिकारी साम अल्टम्यानलाई 'के अन्य प्रणालीहरू पनि यसरी नै प्रभावित भएका छन्?' भनेर सोधिएको प्रश्नमा उनले भने, 'हो, त्यस्तो भएको हुनसक्छ।'
यसैबीच, अमेरिकी सरकारले ओपनएआईको मुख्य प्रतिद्वन्द्वी कम्पनी 'एन्थ्रोपिक' को एउटा मोडल सार्वजनिक गर्नमा रोक लगाएको छ। कम्पनीले पहिले नै 'अत्यधिक जोखिमपूर्ण' भनेको उक्त मोडल सर्वसाधारणका लागि उपलब्ध गराउन खोजेपछि सरकारले हस्तक्षेप गरेको हो।