२७ साउन २०८३, बुधबार
विश्व बैंकले विकासशील देशलाई कृत्रिम बुद्धिमत्ता (एआई) प्रविधिको प्रयोग विस्तार गर्न आग्रह गर्दै यसलाई बेवास्ता गरे ती देश थप पछि पर्न सक्ने चेतावनी दिएको छ।
विश्व विकास प्रतिवेदन सार्वजनिक गर्दै प्रमुख अर्थशास्त्री इन्दरमित गिलले एआईले विकासशील अर्थतन्त्रका लागि महत्वपूर्ण अवसर प्रदान गर्ने बताए। उनका अनुसार स्वास्थ्य, शिक्षा, न्याय र कृषिजस्ता क्षेत्रमा स्थानीय आवश्यकताअनुसार कम लागतका एआई उपकरण प्रयोग गर्न सकिन्छ।
प्रतिवेदनमा एआईले सन् २०२० को दशकको अन्त्यसम्म विकासशील देशको आर्थिक वृद्धिमा योगदान पुर्याउन सक्ने उल्लेख गरिएको छ। बङ्गलादेशमा मधुमेह परीक्षण र भारतमा मौसम पूर्वानुमानमार्फत किसानलाई सहयोग गरिएको उदाहरण पनि प्रस्तुत गरिएको छ।
विश्व बैंकले स्थानीय आवश्यकताअनुसार एआई समाधान विकास गर्न, विद्युत् र कम्प्युटिङ पूर्वाधारमा लगानी बढाउन तथा तथ्याङ्क प्रणाली सुधार गर्न सुझाव दिएको छ। साथै, एआई विस्तार गर्दा गोपनीयता, सार्वजनिक विश्वास र असमानता बढ्न सक्ने जोखिमप्रति पनि सचेत रहनुपर्ने प्रतिवेदनमा उल्लेख छ।
