माया-प्रेम उमेर, सीमा र दूरी केही पनि हेर्दैन भन्ने उखानलाई चरितार्थ गर्दै फ्रान्स र सेनेगलबाट एक अचम्मको प्रेम कहानी बाहिर आएको छ, जसले पछिल्लो समय सामाजिक सञ्जालमा व्यापक चर्चा र ध्यान खिचेको छ। यो अनौठो सम्बन्धमा सबैभन्दा बढी चर्चा दुईबीचको ५७ वर्षको भारी उमेर अन्तराललाई लिएर भइरहेको छ। 

जहाँ एकातर्फ ८१ वर्षीया फ्रान्सीसी महिला छिन् भने अर्कातर्फ अफ्रिकी मुलुक सेनेगलका २४ वर्षीय युवा छन्। इन्टरनेटको माध्यमबाट शुरू भएको यो चिनजान बिस्तारै गहिरो प्रेममा परिणत भएको थियो।

प्राप्त विवरण अनुसार, पछिल्लो दुई वर्षदेखि यो जोडी निरन्तर भिडियो कल र म्यासेजमार्फत एक-अर्काको सम्पर्कमा रहँदै आएका थिए। लामो समयसम्म डिजिटल माध्यमबाट मात्र कुराकानी गरेपछि ती महिलाले आफ्ना प्रेमीलाई प्रत्यक्ष रूपमा भेट्ने निर्णय गरिन्। यसका लागि हजारौँ किलोमिटरको लामो हवाई यात्रा तय गर्दै उनी फ्रान्सबाट सीधे सेनेगल पुगिन्।

सेनेगलको विमानस्थलमा जब यो जोडी पहिलो पटक आमने-सामने भए, तब त्यो पल कुनै फिल्मी दृश्यभन्दा कम थिएन। दुवैले एक-अर्कालाई अँकमाल गर्दै आफ्नो खुसी व्यक्त गरे। त्यहाँ उपस्थित कसैले यो भावुक मिलनको भिडियो क्यामेरामा कैद गरेको थियो, जुन अहिले सामाजिक सञ्जालमा भाइरल बनेको छ। यही भिडियोका कारण यो जोडी अहिले अनलाइन प्रयोगकर्ताबीच बहस र चर्चाको मुख्य विषय बनेको छ।

रिपोर्टहरूका अनुसार यो भेट केवल सामान्य पहिलो भेटमा मात्र सीमित छैन। सेनेगलमा केही समय सँगै बिताएपछि यो जोडी अब फ्रान्स फर्कने तयारी गरिरहेको छ। यति मात्र होइन, उनीहरूले आगामी सेप्टेम्बर २०२६ मै आधिकारिक रूपमा विवाह गर्ने निर्णयसमेत गरेका छन्। 

उमेरका सबै सीमाहरूलाई तोड्दै बाहिर आएको यो अनौठो प्रेम जोडी अहिले विश्वभरका मिडिया र सामाजिक सञ्जालमा केन्द्रबिन्दु बनेको छ।