२७ साउन २०८३, बुधबार
अख्तियार दुरुपयोग अनुसन्धान आयोगले सप्तरीको भेटेरिनरी अस्पताल तथा पशु सेवा विज्ञ केन्द्र, राजविराजका कार्यालय प्रमुख डा रामपवित्र दास र हलुका सवारी चालक भोगेन्द्र यादवविरुद्ध भ्रष्टाचार मुद्दा दायर गरेको छ।
भ्याक्सिनेटरहरूलाई सेवाबापत पाउनुपर्ने पारिश्रमिक भुक्तानी गराइदिएबापत २० प्रतिशत कमिसन लिएको आरोपमा उनीहरूविरुद्ध बुधबार विशेष अदालतमा मुद्दा दायर गरिएको हो ।
डा दासले चालक यादवसँग मिलेमतो गरी भुक्तानी रकमको कम्तीमा २० प्रतिशत घुस माग्दै भ्याक्सिनेटरहरूलाई बाध्य पारेको र त्यसक्रममा १ लाख ३२ हजार ३५० रुपैयाँ घुस लिएको पुष्टि भएको आयोगले जनाएको छ।
उक्त रकमलाई बिगो कायम गर्दै आयोगले दुवै जनाविरुद्ध सोही बराबर जरिवाना र कैद सजायको मागसहित बुधबार विशेष अदालतमा आरोपपत्र दायर गरेको हो ।
