२३ भदौ २०८३, मंगलबार
पूर्वी नाका काँकडभिट्टाबाट हुने वैदेशिक व्यापारमा आयातसँगै व्यापार घाटा पनि बढेको छ । मेची भन्सार कार्यालयको तथ्याङ्कअनुसार आर्थिक वर्ष २०८१/८२ को तुलनामा आर्थिक वर्ष २०८२/८३ मा व्यापार घाटा ४० दशमलव ८५ प्रतिशतले बढेर ३६ अर्ब ३८ करोड नाघेको हो ।
आव २०८१/८२ को असारसम्म काँकडभिट्टा नाका भएर २५ अर्ब ८३ करोड १० लाख ६४ हजार बराबरको व्यापार घाटा रहेकामा आव २०८२/८३ को सोही अवधिमा १० अर्ब ५५ करोड १९ लाख ७८ हजारले वृद्धि भई ३६ अर्ब ३८ करोड ३० लाख ४२ हजार पुगेको छ ।
समीक्षा अवधिमा यस नाकाबाट हुने आयात (पैठारी) २२ दशमलव ७१ प्रतिशतले बढेको छ । आव २०८१/८२ मा ५१ अर्ब आठ करोड ६५ लाख आठ हजार बराबरको सामान आयात भएकोमा गत आव २०८२/८३ मा ११ अर्ब ६० करोड नौ लाख १८ हजारले बढेर ६२ अर्ब ६८ करोड ७४ लाख २६ हजार पुगेको छ ।
सोही अवधिमा निर्यात (निकासी) तर्फ चार दशमलव १५ प्रतिशतको वृद्धि दर्ता भएको छ । आव २०८१/८२ को असारसम्म २५ अर्ब २५ करोड ५४ लाख ४४ हजारको वस्तु निर्यात भएकामा आव २०८२/०८३ मा एक अर्ब चार करोड ८९ लाख ३९ हजारले बढेर २६ अर्ब ३० करोड ४३ लाख ८३ हजार पुगेको छ ।
आयात र निर्यात दुवैमा वृद्धि भएसँगै कूल वैदेशिक व्यापार १६ दशमलव ५७ प्रतिशतले बढेर ८८ अर्ब ९९ करोड १८ लाख १० हजार पुगेको छ । अघिल्लो आवको सोही अवधिमा कुल वैदेशिक व्यापार ७६ अर्ब ३४ करोड १९ लाख ५३ हजार रहेको थियो ।
पूर्वी नाकाबाट हुने कुल व्यापारमा आयातको वर्चस्व झन् बढेको छ । आयात-निर्यात अनुपातको हिसाब गर्दा आव २०८१/८२ मा एकको निर्यात गर्दा दुई दशमलव शून्य दुईको आयात हुने गरेकोमा गत आवमा अनुपात बढेर दुई दशमलव ३८ पुगेको छ ।
कुल व्यापारमा निर्यातको हिस्सा ३३ दशमलव शून्य आठ प्रतिशतबाट घटेर २९ दशमलव ५६ प्रतिशतमा सीमित भएको छ भने आयातको हिस्सा ६६ दशमलव ९२ प्रतिशतबाट बढेर ७० दशमलव ४४ प्रतिशत पुगेको छ।
