२३ भदौ २०८३, मंगलबार
भारतको मध्य प्रदेशस्थित ग्वालियरमा हाल एउटा अनौठो कार चर्चाको केन्द्र बनेको छ, जसलाई देखेर जोकोही छक्क परेका छन्। कारमा बनेका प्रेमका करिब ३४०० वटा 'किसिङ' (चुम्बनका) निशानहरूले मानिसहरूको ध्यान खिचेको छ।
प्राप्त जानकारी अनुसार कारका मालिककी प्रेमिकाले करिब साढे तीन घण्टा लगाएर उक्त कारमा ३४०० वटा किसिङ निशान बनाएकी थिइन्।
दैनिक भास्करको समाचार अनुसार यो मामिला ग्वालियरको गोलाका मन्दिर ट्राफिक थाना क्षेत्रको हो। जब प्रहरीको नजर यो अनौठो कारमा पर्यो, तब यसलाई रोकेर जाँच गरिएको थियो।
कारमा जताततै रहेका किसिङका निशानहरूले प्रहरीकर्मीहरूलाई समेत अचम्ममा पारेको थियो। प्रेमिकाले आफ्ना प्रेमीप्रतिको प्रेम दर्शाउन कारमा यी सबै निशानहरू बनाएकी हुन्। बाटोमा हिँड्ने बटुवाहरूले समेत कौतूहलपूर्वक यो कार हेर्ने गरेका थिए।
यस अनोठो घटनापछि कारको भिडियो जोडीहरूद्वारा सामाजिक सञ्जालमा भाइरल बनाइएको थियो। सामाजिक सञ्जालमा भिडियो भाइरल भएपछि सम्बन्धित युवक निकै चर्चामा आएका छन् र प्रयोगकर्ताहरूले यसमा विभिन्न प्रतिक्रियाहरू दिएका छन्।
यद्यपि, प्रहरीले कारमा बनेका 'किसिङ' का निशानहरूको आधारमा नभई यातायात नियमको उल्लङ्घन गरेको कारणले कारबाही गरेको हो। गोलाका मन्दिर ट्राफिक थाना प्रहरीले कार रोकेर कागजात तथा यातायात नियमहरूसँग जोडिएका पक्षहरूको जाँच गरेको थियो।
नियम उल्लङ्घन गरेको ठहर गर्दै प्रहरीले सवारी चालकमाथि कारबाहीस्वरूप ५,५०० रुपैयाँको चलान (जरिवाना) काटेको छ। कार चालकले पनि आफ्नो गल्ती स्वीकार गर्दै भविष्यमा यस्तो नदोहोर्याउने बताएका छन्। साथै, यस घटना पश्चात् युवकले सार्वजनिक रूपमा प्रहरीसँग माफीसमेत मागेका छन् भने प्रहरीले उनलाई भविष्यमा यस्ता गतिविधि नगर्न कडा चेतावनी तथा सल्लाह दिएको छ।
